वीरगञ्ज । प्रतिनिधिसभा सदस्य निर्वाचनअन्तर्गत पर्सा क्षेत्र नम्बर–२ मा राष्ट्रिय स्वतन्त्र पार्टी (रास्वपा) का उम्मेदवार सुशील साह कानु भारी मतान्तरसहित विजयी भएका छन्। उनले नेपाली कांग्रेसका उम्मेदवार तथा पूर्वमन्त्री अजय चौरसियालाई पराजित गर्दै प्रतिनिधिसभा सदस्यमा निर्वाचित भएका हुन्।

निर्वाचन अधिकृतको कार्यालयले सार्वजनिक गरेको अन्तिम मतपरिणाम अनुसार कानुले २५ हजार २५० मत प्राप्त गरे। उनका निकटतम प्रतिद्वन्द्वी चौरसियाले १० हजार ८० मत पाए। यससँगै कानुले १५ हजार १७० मतान्तरले जित हासिल गरेका हुन्।

त्यसैगरी नेकपा (एमाले) की उम्मेदवार रिमा यादवले ९ हजार ८४४ मत प्राप्त गर्दै तेस्रो स्थान हासिल गरिन्।

यसअघि पर्सा क्षेत्र नम्बर–१ मा हरि पन्त विजयी भइसकेपछि क्षेत्र नम्बर–२ मा पनि रास्वपाको जितसँगै पर्सामा घण्टी चुनाव चिन्हप्रति मतदाताको बलियो समर्थन देखिएको छ। लामो समयदेखि परम्परागत दलहरूको प्रभाव रहेको क्षेत्रमा यसपटक मतदाताले परिवर्तनको पक्षमा मतदान गरेको विश्लेषण गरिएको छ।