बझाङ, २३ चैत । जिल्ला प्रशासन कार्यलय बझाङले कच्ची र पक्की सडकको भाडा निर्धारण गरेको भए पनि यहाँका जीप चालकले मनोमानी गर्दा स्थानियवासी मर्कामा परेका छन ।

जिल्ला प्रशासन कार्यलयले कच्ची सडकमा प्रति किलोमिटर १० रुपैयाँ र पक्की सडकमा ४ रुपैयाँ लिन पाउने भनेर सरोकारवालासंगको साझेदारीमा गाडी भाडा निर्धारण गरेको भए पनि बागथलादेखि कफलसेरीसम्मको गाडी भाडा प्रति किलोमीटर २० रुपैयाँसम्म लिने गरेको स्थानीयबासिन्दा किक्मत धामीले बताएका छन् ।

बागथलादेखि कफलसेरीसम्म करिव २५ र ३० किलोमिटर होला धामीले भने जीप चालकले कसैबाट पाँच सय कसैबाट आठ सयसम्म लिने गरेको बताएका छन् ।

जीपमा चढे पछी आफु संग सामान्य सामान भए पनि लकेज भन्दै सोको समेत रकम लिने गरेको यहाँका स्थानीयबासिन्दाले गुनासो गरेका छन् ।

‘बुंगल नगरपालीकाको झापादेखि कफलसेरीसम्म करीब ९, १० किलोमिटर रहेको छ ।’ स्थानीय बासिन्दा निमा बिष्टले भनिन् ‘यति नजिकैको गाडी भाडा जीप चालकहरुले २ सय देखि २५० सम्म लिने गरेको छन् ।’

यस विषयमा सरोकारवाला निकायले चाँसो नै नदिएको उनको गुनासो छ । यस विषयमा बुंगल नगरपालिकाका प्रमुख धनबहादुर विष्टले आफूहरुलाई यसको जानकारी नभएको प्रतिक्रिया दिएका छन ।

यसबारे कसैले नगरपालिकामा जानकारीसम्म नगरेको र अबको केही दिनमा नगरपालीकाले भाडा निर्धारण गरि कार्यान्वयन गरिने उनको भनाइ रहेको छ ।