बुटवल, २२ चैत्र ।
जिल्ला प्रहरी कार्यालय रुपन्देहीले स्रोत नखुलेको ४० लाख नगदसहित दुई पक्राउ परेका छ । प्रहरीले विशेष सूचनाको आधारमा बेलहिया वाईपासस्थित सडक खण्डमा चेकजांचका क्रममा उक्त रकम फेला पारेको हो । इलाका प्रहरी कार्यालय बेलहिया रुपन्देहीबाट खटिएको प्रहरी टोलीले रकम फेला पारेको रुपन्देही प्रहरीले जनाएको छ ।
बुधबार सांझ बेलहियाबाट भैरहवातर्फ आइरहेको लु२२प ३८७१ नम्बरको स्कुटीमा चेकजांच गर्दा ठूलो परिमाणमा रकम फेला परेको थियो । स्कुटीको डिक्की भित्र कालो र पहेलो प्लाष्टिकले प्याकिङ गरि राखेको अवस्थामा ४० लाख ३८ हजार ७ सय ५० रुपैयाँ र नेपाल एसबिआई बैङकको ३० हजार रुपैयाँको चेक फेला परेको प्रहरीले पुष्टी गरेको छ ।
स्कुटीका चालक दीपककुमार मल्लिकको बयानका आधारमा प्रहरीले रकम सिद्धार्थ नगरपालिका वडा नं ८ का धनवन्तकुमार अग्रवालको रहेको भन्दै उनलाई पनि पक्राउ गरेको छ ।
जिल्ला प्रहरी कार्यालय रुपन्देहीका प्रमुख प्रहरी उपरिक्षक श्याम ज्ञवालीले सिमामा रकम लिएर आउने जाने क्रम स्वाभाबिक भएपनि श्रोत नखुलेका कारण कानुनी कारवाहि अगाडी बढाएको जानकारी दिनुभयो । ज्ञवालीका अनुसार अग्रवालले रकम आफ्नो भएको स्विकारेको तर स्रोत खुलाउन सकेनन् । प्रहरीले बरामद रकम र स्कुटीसहित स्कुटी चालक मल्लीक र अग्रवाललाई आवश्यक कारबाहीका लागि सम्पति शुद्धिकरण अनुसन्धान बिभाग ललितपुर पठाएको छ । प्रहरीका अनुसार अग्रवाल मनी चेन्जर व्यवसायी र मल्लिक अग्रवालको कर्मचारी हुन् ।