सिन्धुली, २२ चैत । उदयपुरको कटारी नगरपालिका वडा नम्बर २ र सिन्धुलीको दुधौली नगरपालिका वडा नम्बर ९ स्थित तावाखोलामा पक्की पुल निर्माण सुरु भएको छ ।

सिन्धुली र उदयपुरको सिमामा पर्ने तावाखोलामा पक्की पुल निर्माण हुन थालेपछि स्थानीय हर्षित भएका छन्। वर्षौ देखिको खोलाको समस्या टर्ने भएपछि स्थानीयहरु हर्षित भएका हुन् ।

तावाखोलाको मारमा पर्दै आएका स्थानियलाई पुल निर्माण पछि आवातजावतको समस्या हल हुने विश्वास छ ।

दुधौदी नगरपालिका ९ का वडा अध्यक्ष रामकुमार अधिकारीले भने, ‘पुल नहुँदाखेरी वारी पारी गर्ने धेरै जनाले बगेर ज्यान गुमाईसकेका छन् । अब पुलको निर्माण पछि त्यस समस्याको अन्त्य हुनेछ ।’

उता पुलको निर्माण पश्चात् उदयपुरको कटारी बजारबाट सिन्धुलीको पुर्व क्षेत्रमा ढुवानी हुने विभिन्न उपभोग्य सामानको आयात निर्यात पनि सहज हुने दुधौली उद्योग वाणिज्य संघका अध्यक्ष बृजनारायण साह बताउँछन्।

कटारी नगरपालिका २ र दुधौली नगरपालिकामा ९ का सर्वसाधरणले वर्खाको समयमा तावा र कमला नदिमा आउने बाढीको कारण प्रसुती, सर्पदंश तथा अन्य आकस्मिक विरामीहरु उपचारबाट बन्चित हुँदै आएका थिए ।

लुम्बिनी शान्ति जेभी काठमाण्डौले पुल निर्माणको जिम्मा पाएको छ । निर्माणाधीन पक्कि पुल चार सय मिटर लामो र साढे १० मिटर फराकिलो हुनेछ।

४२ करोड ८० लाख लागतमा बन्ने उक्त पुल आगामी तीन बर्ष भित्र सम्पन्न भईसक्ने गरी काम भईरहेको निर्माण व्यवसायी हरि कार्कीले बताए ।

हाल पुलको २५ प्रतिशत भन्दा बढि काम सकिएको छ । सरकारले समयमै भुक्तानी दिए पुलको काम एक वर्ष अघिनै सकिने छ। सिन्धुलीको पुर्व क्षेत्रको मुल ढोका मानिने पुललाई उदयपुर सिन्धुलीको आर्थिक सम्बृद्धिको मुलमार्ग हो भन्दा फरक पर्दैन ।