चितवन, २२ चैत । चितवनको सौराहामा वन्यजन्तुको उपचार गर्न अस्पताल निर्माण भइरहेको छ । रत्ननगर नगरपालिका ६ सौराहामा रहेको राष्ट्रिय प्रकृति संरक्षण कोष जैविक बिविधता संरक्षण केन्द्र सौराहाको जग्गामा अस्पताल निर्माण भइरहेको छ ।

करिब ३ करोडको लागतमा गतबर्षदेखी बनाउन सुरु भएको अस्पतालको निर्माण कार्य अन्तिम चरणमा पुगेको छ । सौराहामा निर्माण भइरहेको वन्यजन्तुको अस्पताल नेपालमै पहिलो भएको राष्ट्रिय प्रकृती संरक्षण कोष जैविक बिविधता संरक्षण केन्द्र सौराहाका निमित्त प्रमुख रामकुमार अर्यालले बताउनुभयो ।

अस्पतालको अभावमा अहिले वन्यजन्तुको उपचार गर्न समस्या पर्दै आएको छ । पर्याप्त उपकरण र जनशक्ती अभावमा वन्यजन्तुको उपचार प्रभावकारी हुन सकेको छैन । चितवन राष्ट्रिय निकुञ्ज र राष्ट्रिय प्रकृती संरक्षण कोष जैविक बिविधता संरक्षण केन्द्र सौराहाका चिकित्सक तथा प्राविधिकले घाइते वा बिरामी वन्यजन्तुमा देखिने लक्षण हेरेर वन्यजन्तुको उपचार गर्दै आइरहेका छन् ।

अघिल्लो बर्षमात्रै ३० वटा जनावरको उद्धार गरेर सामान्य उपचार गरिएको चितवन राष्ट्रिय निकुञ्जका सहायक संरक्षण अधिकृत एवं पूर्वी सेक्टर प्रमुख अभिनय पाठकले जानकारी दिनुभयो । सुविधायुक्त अस्पताल भएपछि गैडाँ , बाघ , हात्ती लगायतका वन्यजन्तुको उपचार गर्न सजिलो हुने उहाँले बताउनु भयो । अहिले सिमित स्रोतसाधनको बिच थोरै वन्यजन्तुको मात्रै उपचार गर्न सकिएकोले अस्पताल संचालन भएपछि एकै पटक धेरै वन्यजन्तुको उपचार गर्न सकिने पाठकको भनाइ छ ।

वन्यजन्तुको लागि अस्पताल निर्माण भएपछि राष्ट्रिय निकुञ्ज बिभाग र राष्ट्रिय प्रकृती संरक्षण कोषबाट चिकित्सक एवं प्राविधिकको दरबन्दी राखेर स्तरिय अस्पताल बनाउने सरोकारवालाहरुको योजना छ ।

अस्पतालको अभावमा अहिले घाईते वन्यजन्तुको उद्धार गरेर उपचार गर्न समस्या हुँदै आएको छ । एक्स रे मेसिन, ल्याबको अभावमा चिकित्सकले वन्यजन्तुको लक्षण हेरेर त्यसको उपचार गर्नुपर्ने बाध्यता रहेको राष्ट्रिय प्रकृती संरक्षण कोष जैविक बिविधता संरक्षण केन्द्रका पशु चिकित्सक डा. अमिर सडौलाले बताए ।

तोकिएकै समयमा अस्पतालको निर्माण सम्पन्न भए अबको ४ महिनामा अस्पतालबाटै वन्यजन्तुको उपचार हुनेछ । समयमा नै उचित उपचार पाए सवारीसाधनको ठक्कर बाट घाइते भएका , वन्यजन्तु आपसमा जुध्दा हुने घाइते र बिभिन्न रोगको कारणले अकालमा हुने वन्यजन्तुको मृत्युको संख्या घटाउन सकिनेछ । त्यसैले अस्पताल निर्माण कार्य छिटो सम्पन्न गरेर सेवा सुरु गर्न आवश्यक छ ।