काठमाडौं, १५ चैत । काठमाडौंको दरबारमार्गस्थित होटल ल्यान्डमार्कमा भएको भनिएको सामूहिक बलात्कारका मुख्य आरोपी शैलेश कार्कीको बयान सकिएको छ।

बयानमा शैलेशले सामूहिक बलात्कार अस्वीकार गर्दै आफुलाई फसाएको दाबी गरेका छन्। पीडित युवतीका प्रेमी भनिएका शैलेशले पहिलादेखि नै युवतीसंग सम्बन्ध रहँदै आएको र त्यसदिन पनि सहमतिमै दुई पटक यौन सम्पर्क भएको बयान दिएका छन्। उनले आफूहरु प्रेमीप्रेमिका भएको र विवाह गर्ने सहमतिपछि प्रहरी कार्यालयबाट छुट्टिएको बताएका छन्।

‘आजभन्दा आठ महिनाअघि फेसबुकबाट चिनजान भई ६ महिनाअघिदेखि भेटघाट गरी देखभेट भई चिनजान भएको हो’, शैलेशले बयानमा भनेका छन्, ‘कमलादीस्थीत होटल ल्यान्डमार्क अपार्टमेन्टमा पुगेपछि म र जाहेरीवाली दुवैजना एउटै कोठामा बस्यौं। अन्य साथीहरु अन्य कोठामा बसे। जाहेरीवाली र म एउटै कोठामा कुराकानी गर्दागर्दै रातिको समयमा जाहेरीवालीसँग निजको सहमतिमा मैले निजलाई दुईपटक सहमतिमा शारीरिक सम्पर्क भएको हो। त्यसपछि विस्तारामा मोबाइल खेलाउँदै गर्दा फोन आएकाले एक अर्काको मोबाइल चेक गर्ने निहुँमा सानो विवाद आएका हुनाले सोही रुममा रहेको अर्को बेडमा गएर सुतेको हुँ। निदाएपछि बिहान मात्रै थाहा भई बिउझँदा उसले मलाई घरसम्म पुर्‍याइदिन आग्रह गरेकी थिई।’

घटनाका चार आरोपीमध्ये शैलेशमात्र पक्राउ परेका छन्। प्रहरी अनुसन्धानमा बलात्कारको घटना मिलाउन शैलेशको समूहले ३० लाख रुपैयाँ दिएको खुलेको थियो। शैलेशले भने विवाह गर्ने सहमतिपछि घटना मिलेको बताएका छन्। प्रहरीमा उजुरी परेको कुराले आफू आश्चर्य चकित परेको पनि उनले बताएका छन्।