काठमाडौं, २४ फागुन । एमालेसँग चुनावी तालमेल गरेको माओवादी केन्द्रभित्र सभामुख बन्नको लागि आकांक्षी आधा दर्जनभन्दा बढी छन् । सार्वजनिक रुपमा मुख नखोले पनि माओवादी केन्द्रका नेताले राष्ट्रपति र प्रधानमन्त्री एमालेले पाएपछि सभामुख आफुले पाउनुपर्ने दाबी गर्दै आएका छन् ।

यही आधारमा सभामुखका लागि माओवादीका नेताहरुबीच को सभामुख बन्ने भन्ने बारेमा चर्को विवाद उत्पन्न भएको छ ।

पार्टीभित्र आधा दर्जन नेताले सभामुखका लागि दाबेदारी देखाउँदै लविङ बढाउन अध्यक्ष प्रचण्डलाई दबाव दिन थालेका छन् । धेरै आकांक्षी भएपछि माओवादीमा सभामुख छान्ने कुरा गृहमन्त्री छान्नुभन्दा बढी तनाबको बन्ने निश्चित भएको छ ।

अघिल्लो पटक सभामुख बन्न आग्रह गर्दा अस्वीकार गरेका कृष्णबहादुर महरा यसपटक आफु सभामुखको स्भाविक दाबेदार भएको दाबी गरेका छन् । आफु नबोले पनि भित्रभित्र प्रचण्डलाई दबाब दिने काम महराबाट भएको छ । आफुलाई भारत र चीनको उत्तिकै विश्वासपात्र सम्झिने महराले प्रचण्डलाई दुई देशको सन्तुलन मिलाउन पनि आफै सभामुख हुनुपर्ने तर्क गरेका छन् । तर, महराले बाहिर अरु नेताले जस्तो सार्वजनिक रुपमा म बन्नुपर्छ भनेर बोल्दैनन् ।

दुई वर्ष सभामुख बनेर अनुभव बटुलेको आधारमा यसपटक पनि आफै सभामुख बन्नुपर्ने तर्क ओनसरी घर्तीले गरेकी छिन् । उनका श्रीमान वर्षमान पुनले सरकारको नेतृत्व आफुले पाउनुपर्ने या गृहमन्त्री पाउनुपर्ने त्यो नभए ओनसरीलाई सभामुखमा निरन्तरता दिनुपर्ने भन्दै प्रचण्डलाई दबाब दिँदै आएका थिए । अध्यक्ष प्रचण्डको अतिनिकट भएको दाबी गर्ने पुनकै कारण सरकारमा मन्त्री छान्न माओवादीलाई सकस परको थियो ।

तर, पुन, एमाले माओवादी एकताप्रति सकारात्मक नभएको भन्दै एमाले अध्यक्ष एवं प्रधानमन्त्री केपी ओली पुनलाई विश्वसनीय मान्दैनन् । यद्यपी, राष्ट्रपति र उपराष्ट्रपति दोहोर्याएपछि सभामुख पनि दोहोर्याउनु उचित हुने भन्दै पुनले आफुनिकट नेता कार्यकर्ता र संचारमाध्यम भने अझैसम्म पनि प्रयोग गर्न छोडेका छैनन् ।

आफुले कानुन पढेको भन्दै सभामुख चलाउन योग्य रहेको दलील पेश गरेका छन्, अर्का नेता देव गुरुङले । रामबहादुर थापासँगै पार्टी छोडेर एकवर्षअघि पुनः भित्रिएका गुरुङले सिनियर नेता भएका कारण पनि आफुले सभामुख पाउनुपर्ने दाबी गरेका छन् । माओवादीको यसअघि बसेको केन्द्रीय कार्यालय बैठकमा गुरुङले सभामुख हुन पाउनुपर्ने औपचारिक प्रस्ताव राखेका थिए । यद्यपी, सबै पद बादल गुटले मात्र पाउन नहुने भन्दै उनीविरुद्ध माओवादीका तेस्रो तहका नेताहरु खडा भएका छन् ।

उता, प्रचण्डकी बुहारी बिना मगरलाई ७ नं। प्रदेशबाट मन्त्रीको रुपमा पेश गर्दै आफु सभामुख बन्न पाउनुपर्ने दाबी गरेका छन्, लेखराज भट्टले । सुदुरपश्चिममा एकलौटी निर्णय गर्दै आएका भट्टले प्रचण्डलाई रिझाउनकै लागि बिनालाई मन्त्रीमा सिफारिस गरेका थिए ।

माओवादीभित्र गच्छदार प्रवृति धारण गरेको भनेर चिनिने गिरिराजमणि पोखरेलले पनि यसपाला सभामुख बन्न पाउनुपर्ने दाबी गरेका छन् । अहिलेसम्म कुनैपनि सरकारमा मन्त्री बन्न नछुट्ने पोखरेलले यसपाला नारायणकाजी गुटको फाइदा उठाउँदै मन्त्री भन्दा सभामुखमै नजर लगाइरहेका छन् । अघिल्लो पटक सभामुख बन्न आग्रह गर्दा पोखरेलले अस्वीकार गरेका थिए ।

अर्का नेता अग्निप्रसाद सापकोटाले पनि प्रचण्डलाई दबाब बढाएका छन् । आफु मन्त्री नबन्ने भएपछि सभामुख बनाइदिन सापकोटाले आफु निकट नेता कार्यकर्ताबाट प्रचण्डलाई दबाब बढाएका हुन् ।

धेरै नेताहरुले सभामुख ताकेपछि अध्यक्ष प्रचण्ड भने तनाबमा परेका छन् । पूर्व सभामुख एवं एमाले नेता सुवास नेम्वाङलाई ‘अन्तिममा सभामुख बन्ने त तपाईं नै हो’ भनेर एमाले अध्यक्ष केपी ओलीकै सामुन्ने बचन दिएका प्रचण्ड अहिले न त सभामुखमा सुवास नेम्वाङ नै हो भन्न सक्छन्, न त, आफ्ना नेताहरुलाई नै व्यवस्थापन गर्न सक्ने अवस्थामा छन् ।

यौटा सभामुख बनाउन ६-६ जना नेताको हानथाप बढेपछि तनाबमा परेका प्रचण्डले सभामुख पदबारे निर्णय गर्न प्रधानमन्त्री एवं एमाले अध्यक्ष केपी शर्मा ओलीसँग अन्तिम छलफल गर्ने बुझिएको छ ।