काठमाडौं — इरानका नयाँ सर्वोच्च नेता मोज्तबा खामेनी युद्धको पहिलो दिनमै गम्भीर घाइते भएको खुलासा भएको छ। अन्तर्राष्ट्रिय समाचार संस्था रोयटर्सका अनुसार फेब्रुअरी २८ मा अमेरिका र इजरायलको संयुक्त आक्रमणमा परेर उनी घाइते भएका हुन्।

उक्त आक्रमणमा उनका पिता तथा पूर्व सर्वोच्च नेता अली खामेनी सहित थुप्रै उच्च अधिकारी मारिएका थिए। त्यसको करिब १० दिनपछि मोज्तबा खामेनीलाई सर्वोच्च नेतामा चयन गरिएको थियो।

अनुहार र खुट्टामा गम्भीर चोट

रोयटर्सले खामेनीनिकट स्रोतहरूलाई उद्धृत गर्दै उनका अनुहार र खुट्टामा गम्भीर चोट लागेको र अनुहारमा विकृति आएको जनाएको छ। केही गुप्तचर स्रोतहरूले त उनको एउटा खुट्टा गुमेको हुन सक्ने आशंका समेत व्यक्त गरेका छन्।

अमेरिकी रक्षा मन्त्री पिट हेगसेथ ले पनि खामेनी गम्भीर घाइते भएको पुष्टि गरेका छन्।

सार्वजनिक रूपमा अनुपस्थित, तर निर्णयमा सक्रिय

५६ वर्षीय खामेनी हालसम्म सार्वजनिक रूपमा नदेखिएका छन्। न त कुनै अडियो वा भिडियो सन्देश नै सार्वजनिक गरिएको छ।

यद्यपि, उनी मानसिक रूपमा सक्षम रहेको र अडियो कन्फरेन्समार्फत वरिष्ठ अधिकारीहरूसँग सम्पर्कमा रहेको बताइएको छ। युद्ध र अमेरिकासँगको वार्ताजस्ता महत्वपूर्ण निर्णयमा उनी अप्रत्यक्ष रूपमा संलग्न रहेको जनाइएको छ।

सत्ता संरचनामा प्रभाव

इरानको शासन प्रणालीमा सर्वोच्च नेता सबैभन्दा शक्तिशाली पद हो, जसले सेना र विशेषगरी इस्लामिक रिभोलुसनरी गार्ड कोर जस्ता निकायलाई नियन्त्रण गर्छ।

खामेनी घाइते भएपछि केही समयका लागि सर्वोच्च सुरक्षा परिषद्का सचिव अली लरिजानी ले शासन सञ्चालन गरेका थिए। तर उनी पनि हमलामा मारिएपछि अहिले सभामुख मोहम्मद बाघेर गालिबाफ लाई सबैभन्दा शक्तिशाली अधिकारीका रूपमा हेरिएको छ।

सामाजिक सञ्जालमा अड्कलबाजी

खामेनी सार्वजनिक रूपमा नदेखिएपछि सामाजिक सञ्जालमा व्यापक अड्कलबाजी सुरु भएको छ।
“मोज्तबा कहाँ छन्?” भन्ने प्रश्नसहितका मिमहरू भाइरल भइरहेका छन्।

उनका समर्थकहरूले भने सुरक्षा कारणले सार्वजनिक रूपमा नदेखिएको दाबी गरेका छन्।

अब के हुन्छ ?

विश्लेषक एलेक्स भटंका का अनुसार मोज्तबा खामेनीले आफ्नो पिताजस्तै पूर्ण नियन्त्रण स्थापित गर्न समय लाग्नेछ। “उनी प्रभावशाली आवाज त हुनेछन्, तर निर्णायक शक्ति बन्न समय लाग्छ,” उनले बताएका छन्।

वार्तासँगै खुल्यो नयाँ तथ्य

इरान–अमेरिका शान्ति वार्ताका लागि गालिबाफ नेतृत्वको टोली इस्लामाबाद पुगेकै बेला खामेनीको स्वास्थ्यबारे यस्तो खुलासा भएको हो। यसले वार्ता, सत्ता सन्तुलन र युद्धको दिशा—तीनैमा असर पार्न सक्ने विश्लेषण गरिएको छ।