काठमाडौं ४ मंसिर । भौतिक पूर्वाधार तथा यातायातमन्त्री देवेन्द्र दाहालले सडकको क्षमता भन्दा बढी भार बोकेका सवारी साधन चल्नबाट पूर्ण रोक लगाउने बताएका छन् ।

नेपाल ट्रक यातायात व्यवसायी महासंघले धादिङमा आयोजना गरेको कार्यक्रममा मन्त्री दाहालले ४९ टनभन्दा बढी भार बोकेर सडकमा गुडाउन नपाउने कार्यविधि बनाएको पनि जानकारी दिए ।

४९ टन भन्दा बढी भार बोकेर सडकमा गुड्ने सवारी साधानलाई के कारबाही हुने भन्ने स्पष्टता नरहेकाले सरकारले अहिले त्यसलाई पूर्ण रुपमा रोक लगाउने गरी आवश्यक प्रबन्ध गर्न लागेको बताए । छिमेकी मुलुकहरूको बाटोबाट आएका सामानहरूलाई सीमानाकामै निरीक्षण गरी सडकको भार क्षमता भन्दा बढी बोक्न नदिने तयारी भइरहेको उनले जानकारी दिए ।

‘बाटोको क्षमताअनुसार हाम्रो देशमा र संसारमै पनि कुरा के हो भने कति चक्के गाडी हो । थोरै चक्के गाडी छ भने त्यसको भारवहन क्षमता कम हुन्छ । जति चक्का बढायो त्यति त्यसको भारवहन क्षमता बढ्छ । तर हाम्रो देशको बाटोलाई मध्येनजर गरेर हामीले ४९ टन भन्दा बढी भार बोकेर यो बाटोमा हिँड्न नपाउने भन्ने एउटा कार्यविधि बनाएका छौँ । तर त्यो भन्दा बढी हुँदा के गर्ने भन्ने सन्दर्भमा हाम्रो बीचमा त्यति धेरै स्पष्टता छैन । जरिवाना गर्ने, जरिवाना गरिसकेपछि बाटोमा हिँड्न पाउने त पक्कै पनि हुनुहुँदैन ।

त्यसले गर्दा हामीले त्यसलाई पूर्ण रुपले रोक लगाउँदै छौँ,ु दाहालले भने, ुविदेशबाट आएका सामान छन् भने, छिमेकी मुलुकको बाटोबाट आएका सामान छन् भने त्यो चेक प्वाइन्टमा नै निर्धारण गरिनुपर्छ । हाम्रो बाटोमा कति क्षमता भार बोकेका चार चक्के, १० चक्के वा २८ चक्के गाडी पनि छन् । ती गाडीले कति क्षमतासम्मको भार बोकेर हिँड्न पाउँछन् भन्नेकुराको निर्धारण चेक प्वाइन्टमै निगरानी गर्नुपर्छ ।

त्यसरी रोक्नका लागि नियमावली, कार्यविधिले नपुगे कानुन बनाउन पनि सरकार तयार रहेको दाहालले बताए । सरकारमा विकासका काम अघि बढाउने हुटहुटी रहेको पनि उनको भनाइ थियो ।