काठमाडौं, २३ फागुन । सर्वोच्च अदालतले दृष्टिविहीनलाई सगरमाथा चढ्नबाट रोक नलगाउन अन्तरिम आदेश जारी गरेको छ।

प्रधानन्यायाधीश गोपाल पराजुली, दीपकराज जोशी, ओम प्रकाश मिश्र, चोलेन्द्र शम्शेर जबरा र दीपककुमार कार्कीको संवैधानिक इजालसले पर्वतारोहण सम्बन्धी नियमावली २०५९ को व्यवस्था तत्काल कार्यान्वयन नगर्न अन्तरिम आदेश जारी गरेको हो।

पर्वतारोहण सम्बन्धी नियमावली २०५९ ले दुईटै खुट्टा वा दुईटा आँखा नभएका व्यक्तिहरुलाई पर्वतारोहण अनुमति दिन रोक लगाएको थियो।

दृष्टिविहीन अमित केसी नामले चिनिने चित्रबहादुर खत्री क्षेत्रीले आफूलाई सरकारले गैर कानुनी र गैर संवैधानिक रुपमा सगरमाथा चढ्नबाट बञ्चित गरेको भन्दै सर्वोच्च अदालतमा रिट हालेका थिए।

रिटमा निवेदकले नियमावलीको प्रावधान सविधानको धारा १८ को उपधारा २ अनुसारको समानताको हक बिपरित भएकाले नियमावलीको व्यवस्था खारेज गर्न माग गरेका थिए।