काठमाडौं १३ कात्तिक । गृहमन्त्री रमेश लेखकले युग सुहाउँदो तालिम र प्रविधिसहितको परिचालनले मात्र अबका सुरक्षा चुनौती सामना गर्न सकिने बताएका छन् ।

काठमाडौंको मातातीर्थस्थित राष्ट्रिय सशस्त्र प्रहरी बल प्रशिक्षण प्रतिष्ठानमा मंगलबार आयोजित सशस्त्र प्रहरी निरीक्षक आधारभूत तालिम दीक्षान्त समारोहमा मन्त्री लेखकले सुरक्षा चुनौती सामना गर्न प्रविधिसहितको प्रहरीको आवश्यकता रहेको बताएका हुन् ।

सशस्त्र प्रहरीले राज्यले सुम्पिएका जिम्मेवारीका साथै भइपरी आउने विषम परिस्थितिमा व्यावसायिक दक्षता प्रदर्शन गरी आफ्नो पहिचान स्थापित गरिरहेको मन्त्री लेखकको भनाइ थियो ।

सशस्त्र प्रहरी बललाई प्रविधिमैत्री एवं चलायमान बनाउनेतर्फ मन्त्रालयले काम गरिरहेको पनि मन्त्री लेखकको भनाइ थियो । ‘७७ वटै जिल्लामा परिचालित सशस्त्र प्रहरी बललाई थप जनशक्ति व्यवस्थापनका साथै भौतिक पूर्वाधार, सुरक्षा युग सुहाउँदो बन्दोबस्ती सामग्रीले सुसंस्कृत गर्दै लैजान गृहमन्त्रालय प्रयासरत छ,’ मन्त्री लेखकले भने, ‘नीतिगत व्यवस्था र कार्यान्वयनको तहमा गर्नुपर्ने आवश्यक सम्पूर्ण सहयोग गर्न मन्त्रालयबाट कुनै कमी नहुने कुरामा विश्वस्त रहन आग्रह गर्दछु ।’

मौजुदा स्रोतसाधनको प्रयोग गरी नतिजा हासिल गर्नेतर्फ विगत र वर्तमानमा जस्तै क्रियाशील रहिरहन सशस्त्र प्रहरीलाई गृहमन्त्री लेखकले निर्देशन दिएका थिए । ‘सुरक्षा निकायका हरेक सदस्यले संविधान र प्रचलित ऐन–नियमको परिधिभित्र रही मानवअधिकारको संरक्षण र परिपालनामा कर्तव्यनिष्ठ भई कार्य गरे लोकतान्त्रिक संस्कार र विधिको शासन स्थापित हुँदै जान्छ,’ उनले भने, ‘विधिको शासन र कानुनी राज्यको मूल मर्मलाई आत्मसात् गर्दै कानुन पालना गर्ने गराउने निकायले चनाखो एवं होसियार रहेर आफ्ना काम(कारबाही संचालन गर्नु गराउनुपर्ने अहिलेको अपरिहार्य आवश्यकतालाई मनन गर्नु होला ।’

प्रशिक्षण कार्यलाई समयानुकूल थप आधुनिक र वैज्ञानिक बनाउँदै लगिएको भन्दै यसले राज्यलाई दक्ष र व्यावहारिक अधिकृत निर्माणमा खेलेको भूमिकाको गृहमन्त्री लेखकले गरेका थिए । सशस्त्र प्रहरीभित्र एउटा निश्चित, स्पष्ट, वैज्ञानिक किसिमले सबैको हित हुने ढंगले अगाडि बढ्ने व्यवस्था गरिने उनले बताए ।

सशस्त्र प्रहरीको नयाँ ऐनले सशस्त्र प्रहरीको सेवालाई विशिष्ठकृत गर्दै जैलाने भन्दै आगामी संघीय संसद् अधिवेशनमा पेस गरिने मन्त्री लेखककले जानकारी दिए । ‘सशस्त्र प्रहरी बलेको मौजुदा कानुनलाई परिवर्तन गरेर नयाँ कानुन निर्माणमा अगाडि बढेको छौँ । यसले सशस्त्र प्रहरी बललाई थप सक्षम, सबल र व्यावसायिक बनाउने मैले विश्वास लिएको छु,’ उनले भने, ‘नयाँ कानुनका सम्बन्धमा परामर्शको काम अन्तिम चरणमा पुगेको छ । आगामी संघीय संसद्को अधिवेशनमा पेस गरेर कानुन निर्माण गरेर जानेछौं ।’

सशस्त्र प्रहरीले खेलकुदको क्षेत्रमा पनि महत्त्वपूर्ण भूमिका निर्माण गरेको पनि मन्त्री लेखकले बताए । ‘सशस्त्र प्रहरी बल नेपालका खेलाडीहरूले राष्ट्रिय अन्तराष्ट्रियस्तरमा राम्रो प्रदर्शन गरेको स्थिति छ । नेपाल सरकारले कानुनी व्यवस्था गरेर खेलाडीहरूलाई विशेष पद सिर्जना गरी नियुक्त गर्न सक्ने गरी नीति बनाउन लागेको छ,’ उनले भने ।