काठमाडौं १६ असार । इरानको चुनाव मुख्यालयका अनुसार १४ औं इरानी राष्ट्रपतिका लागि पूर्वस्वास्थ्यमन्त्री मसुद पेजेस्कियान र पूर्वप्रमुख आणविक वार्ताकार सईद जलिलीबीच प्रतिष्पर्धा हुने भएको छ । पहिलो चरणमा अग्रस्थानमा रहेका दुई बीच प्रतिष्पर्धा हुने भएको हो । कसैले पनि ५० प्रतिशत मतको न्युनतम थ्रेसहोल्ड प्राप्त गर्न सकेनन् ।

अर्को शुक्रवार दुईबीच प्रतिष्पर्धा हुनेछ । इरानको निर्वाचन मुख्यालयका प्रवक्ता मोहसेन इस्लामीले मतदानमा ४० प्रतिशत मतदान भएको बताउनु भयो । पेजेस्कियानले १ करोड ४१ लाख ५ हजार ९९१ मत प्राप्त गर्नुभयो । जुन कुल गणनाको ४२ प्रतिशत भन्दा बढी हो । जबकि जलिलीले ९४ लाख ७३ हजार २९८ मत प्राप्त गर्नुभयो । यो ३८ प्रतिशत भन्दा बढी हो ।

संसदका सभामुख मोहम्मद बाकेर कालिबाफले ३३ लाख ८३ हजार ३४० अर्थात १३।८ प्रतिशत र पूर्वगृहमन्त्री तथा न्यायमन्त्री मोस्तफा पौरमोहम्मदीले २ लाख ६ हजार ३९७ अर्थात ०।८ प्रतिशत मत प्राप्त गर्नुभयो । राष्ट्रपति पद सुरक्षित गर्न उम्मेदवारले पहिलो चरणमा कुल मतको ५० प्रतिशतभन्दा बढी मत प्राप्त गर्नुपर्नेछ । रन–अफको लागि जसले धेरै भोटहरू प्राप्त गर्दछ उसले जितको दाबी गर्नेछ ।