बुटवल, १३ फागुन ।उच्च शिक्षा हासिल गर्न आएका बिद्यार्थीहरुले सृङ्लाबद्ध आत्माहत्या गरिरहंदा बिद्यार्थी कै दोष देखाएर घटना सेलाउने गरेपनि बुटवलको एउटा आत्माहत्याले भने आन्दोलनको स्वरुप लिएको छ । शिक्षकले दिने मानसिक यातनाका कारण बिद्यार्थीहरु आत्माहत्या गर्न बाध्य हुने गरेको भन्दै बिद्यार्थीहरुले मानसिक यातना बिरुद्ध आन्दोलित भएका छन् ।

शिक्षकले अनावश्यक लान्छना लगाएकै कारण बिद्यार्थीले आत्माहत्या गर्न बाध्य बनेको भन्दै बुटवलको अक्सफोर्ड कलेजका विद्यार्थी न्याय माग्दै सडक उत्रिएका छन् । शुक्रबार मध्यान्ह आत्माहत्या गरेका बिद्यार्थी बिक्रम सापकोटाका सहपाठीहरुले शनिबार देखी नै बुटवलमा आन्दोलन सुरु गरेकाछन् । सापकोटाले शुक्रबार दिउंसो घरमै आत्महत्या गरेका थिए ।
अक्सफोर्ड प्रशासनका अनुसार शुक्रबार बिहान कलेज पढ्न आएका विक्रमलाई मदिरा खाएर आएका अर्को साथीसंग ढिलो कलेज आएको भन्दै कलेज प्रशासनले अभिभावकलाई खवर गरिदिएको थियो । स्कुल समयन्दा ढिलो आएको र मदिरा पिएर स्कुल आएको भन्दै अक्सफोर्डका शिक्षक डिल्लीबल्लभ पाण्डेले आईडि कार्ड खोस्नुका साथै कुटपिट समेत गरेको बिद्यार्थीहरुले आरोप लगएका छन् । बिद्यार्थीहरुका अनुसार बिक्रमले त्यस दिन मदिरा सेवन नगरेको र शिक्षकलाई बिश्वास नलागे डक्टरी गर्न समेत आग्रह गरेका थिए । तर शिक्षकले झुटो आरोप लगाउंदै घर खबर गरिदिएको र मानसिक यातना दिएका कारण बिद्यार्थीले आत्माहत्या गरेको बिद्यार्थीहरुको भनाई छ ।
कलेजले विगतमा पनि यस्ता घटना गर्दा विद्यार्थीको पठनपाठनमा असर परेको भन्दै विद्यार्थीहरु आन्दोलनमा उत्रिएको बताएकाछन् उनीहरुले घटनाको सही अनुसन्धान गर्न प्रशासनसंग माग समेत गरेका छन् ।

शनिबार दिउंसो कलेजको मुल ढोकामा ताला लगाएर प्रदर्शनमा उत्रीएका बिद्यार्थीहरु आईतवार दिनभरी प्रदर्शन गरिरहेका थिए । प्रदर्शनमा सहभागि अक्सफोर्डकै पुर्व बिद्यार्थी पबित्रा श्रीस मगरले कलेजमा महिला शौचालयमा पुरुष आएर गलत क्रियाकलाप गर्ने गरेको समेत आरोप लगाएकी छिन् ।

बिक्रमकै सहपाठीहश्रले पनि बिक्रम जोक्सहरु सुनाउने र हंसाउने खालको भएपनि खराब बानी भएको आफुहरुले महसुस नगरेको बताउंछन् ।

कलेजले भने गलत क्रियाकलाप गरेको आशंकामा विक्रमलाई सामान्य ढंगले सम्झाएको बताएको छ । विद्यालयका प्राचार्य दिनेश भुसालले कलेजमा आएका विद्यार्थी बिहानै ४५ मिनेटसम्म कक्षा कोठामा नआएको र पछि कोठामा आउंदा विक्रसंगैका साथीले मादक पदार्थ सेवक गरी विद्यालयमा आएका कारण कार्यालयमा लगेर हप्काएको बताउंछन् । बिद्यार्थीहरुलाई सुधार्न सामान्य कुटपिट गर्नु संसारभरीको प्रचलन रहेको भुसालको भनाई छ ।

रुपन्देहीको सालझण्डी घर भएका बिक्रम सापकोटा अक्सर्फोड कलेजको ब्यवस्थापन संकाय कक्षा १२ मा अध्ययनरत थिए । विद्यालय प्रशासनले सोधपुछ गरी अभिभावकको जिम्मा लगाएको र विक्रम विहान ११ः४५ बजे स्कुल बसमै घर फर्किएको बताएको छ ।

बिद्यार्थीहरुलाई कुटपिट वा यातना दिएर शिक्षा दिन नसकिने बिषयमा बहस हुने गरिएपनि बिद्यालयहरुमा यातना दिने क्रम भने रोकिएको छैन । आत्महत्याकै अवस्थामा पुग्ने गरि यातना दिइएको हो भने त्यसको जिम्मा स्कुलले लिनै पर्दछ । मदिरा सेवन गरेकै भए पनि त्यस्ता बिद्यार्थीलाई स्कुलबाट निस्कासन गर्ने वा नपढाउने अधिकार सुनिश्चित हुंदा हुंदै सारिरीक वा मानसिक यातना दिने कुरालाई निरुत्साहित गर्न सबै तयार हुनै पर्दछ ।