काठमाडौँ, १३ फागुन । माओवादी केन्द्रका अध्यक्ष प्रचण्डले चितवनको भरतपुर महानगरपालिका–९ स्थित हाकिमचोकमा सांसद सम्पर्क कार्यालयको उद्घाटन गरेका छन् ।

आईतबार कार्यायलको उद्घाटन गर्दै अध्यक्ष दाहालले चितवनमा सुशासनसम्बन्धी काम र जनताका दैनिक समस्या समाधान गर्न जनसम्पर्क कार्यालयको भूमिका रहने बताए।

कार्यालयको उद्घाटन गर्दै उनले भने, ‘प्रचण्ड नभए पनि जनतालाई प्रचण्ड भएको महसुस जनताले गरुन् ।’ जनताका हरेक गुनासामा हातेमालो गर्दै अगाडि बढ्न कार्यालयको भूमिका महत्वपुर्ण रहने उनले बताए । चितवन जिल्लामा कसरी काम हुन्छ भनेर सानादेखि ठूला विकास निर्माणको काम राष्ट्र र विश्वले हेरिरहेको उनले बताए ।

अवसर र जिम्मेवारी दुबै मनन् गर्दै समृद्धिको बाटोमा हिँड्ने समय आएको धारणा उनले राखे । जनतासँग जीवन्त रुपमा जोडिएर काम गर्न कार्यालयका प्रतिनिधिलाई अध्यक्ष प्रचण्डले आग्रह गरे ।

‘राष्ट्रिय भूमिकाका कारण सधै चितवनमा बस्न नपाएपनि प्रतिनिधिमार्फत् हरेक समय जोडिएर अगाडि बढ्ने प्रतिवद्धता व्यक्त गर्छु,’ उनले भने ।

जनताको हरेक सुख दुःखमा सँगसँगै रहेर विकास निर्माण, सुशासन र समृद्धिको लागि अगाडि बढ्ने उनले बताए ।