नेपालगन्ज, १६ माघ । माघ ११ गतेदेखि बाँकेको नेपालगन्जमा सुरु भएको प्रादेशिक महोत्सव २०७४ मा दिनप्रतिदिन मानिसहरुको भिड बढ्दै जान थालेको छ ।

मंगलबार प्रादेशिक महोत्सव अवलोकन गर्ने मानिसहरुको घुइचो लागेको थियो । मंगलबार मात्र ४० हजार मानिसहरुले महोत्सवको प्रत्यक्ष अवलोकन गरेको आयोजक नेपालगन्ज उद्योग बाणिज्य संघले जनाएको छ । बिदाको दिन भएकाले पनी महोत्सव अवलोकन गर्ने मानिसहरुको भिड बढेको थियो ।

महोत्सवमा राखिएका विभिन्न स्टलदेखि बाल उद्यानसम्म मानिसहरुको भिड लागेको थियो । बाके जिल्ला तथा आसपासका जिल्लाहरुबाट समेत महोत्सव अवलोकन गर्न मानिसहरु आएका थिए । महोत्सवमा मंगलबार चर्चित गायक तथा संगितकार कालि प्रसाद बास्कोटाले दर्शकहरुलाई छमछमी नचाएका थिए ।

बास्कोटाले आफ्नो प्रस्तुती राख्दा सुरक्षाकर्मीलाई भिड नियन्त्रण गर्न हम्मेहम्मे परेको थियो । अन्य स्थानीय तथा राष्ट्रिय कलाकारहरुले समेत आफ्नो प्रस्तुती राखेका थिए ।

माघ २२ गतेसम्म संचालन हुने महोत्सवमा २ सय ६० वटा ब्यवसायीक स्टलका अलावा ५ कृषी, ४ जडिबुटी, १४ अटोमावाईल्स, २२ रेष्टुरेन्ट र १६ विदेशी स्टल सहित कुल ३ सय २१ स्टलहरु रहेका छन् ।

२ लाख बढि दर्शकले अवलोकन गर्ने अपेक्षा गरीएको महोत्सवबाट १ करोड बढि रकम बचत गर्ने लक्ष्य आयोजक नेपालगन्ज उद्योग वाणिज्य संघले जनाएको छ ।