वीरगन्ज, १५ माघ । राजश्व अनुसन्धान विभाग मध्यमाञ्चल क्षेत्रीय कार्यालय पथलैयाले वीरगन्जको अलग अलग दुई सुन चाँदी पसलमा छापा मारेको छ ।

राजश्व अनुसन्धान अधिकृत भिम देवकोटाको नेतृत्व गएको टोलीले वीरगन्को घण्टाघरस्थित लिङ्करोडमा रहेको श्री बालाजी ज्वेलर्स र गहवामा रहेको ओम ज्वेलर्स सुन पसलमा आज अपरान्ह छापामारी गरेको हो ।

विशेष सुराकीको आधारमा आफुहरुले छापामारेको राजश्व अनुसन्धान विभाग मध्यमान्चल क्षेत्रिय कार्यालय पथलैया वाराका अनुसन्धान अधिकृत भिम देवकोटाले संचारकर्मीहरुलाई बताएकाछन् ।

राजश्व अनुसन्धान कार्यालयले आज वीरगन्जको दुई अलग अलग स्थानमा रहेको सुनचाँदी पसलमा छापामारेपछि पर्सा सुनचाँदी व्यवसायी संघले विरोध समेत जनाएको छ ।

कुनै व्यापारिक प्रतिष्ठानमा अथवा उद्योग पसलमा छापामार्ने बेलामा उद्योग वाणिज्य संघ, कर कार्यालय, सम्बन्धित संघ संस्थाका प्रतिनिधि, वाणिज्य कार्यालयका प्रतिनिधि र जिल्ला प्रशासन कार्यालयका प्रतिनिधिहरुको उपस्थिति अनिवार्य हुनुपर्ने व्यवस्था रहेको छ । तर, राजश्व अनुसन्धान कार्यालय बाराले छापामार्ने क्रममा त्यो प्रक्रिया पुरा नगरेकोमा पर्सा सुनचाँँदी ब्यवसायी संघले ठूलो विरोध जनाएका थिए ।

राजश्व अनुसन्धानले छापा मार्ने क्रममा नेपाल प्रहरी र सशस्त्र प्रहरीको टोली ठूलो संख्यामा सो क्षेत्रमा परिचालित समेत गरेका थिए ।