काठमाडौँ, २४ फागुन । प्रधानमन्त्री पुष्पकमल दाहाल ‘प्रचण्ड’ले मुस्ताङमा बौद्ध विश्वविद्यालय खोल्न सरकारले स्वीकृति नदिएको बताएका छन् ।

एमाले अध्यक्ष केपी शर्मा ओलीले मुस्ताङमा भारतलाई बौद्ध विश्वविद्यालय खोल्न दिएर सरकारले चीनमाथि गद्दारी गरेको आरोप लगाइरहेका बेला प्रधानमन्त्री प्रचण्डको यस्तो जबाफ आएको हो ।

मंगलबार काठमाडौँमा आयोजित एक कार्यक्रममा बोल्दै उनले अहिले मुस्ताङको विषयमा बडो चर्चा भइरहेको उल्लेख गर्दै त्यहाँ स्थानीय तहले विश्वविद्यालयभन्दा पनि कलेज खोल्ने विषयमा धेरै पहिलेदेखि कुरा चलाइरहेको आफूले पाएको स्पष्ट पारे ।

“अहिले मुस्ताङको विषयलाई लिएर बडो चर्चा–परिचर्चा हुने गरेको छ । मुस्ताङमा युनिभर्सिटी खोल्ने रे । मुस्ताङमा अलि धेरै मान्छेको ध्यान छ । मुस्ताको बारेमा धेरै पहिलेदेखि चर्चा÷परिचर्चा हुने गरेको पनि छ । मुस्ताङमा अमूल्य खनिज पदार्थ छन् । र, त्यो खनिज पदार्थको उत्पादन र उत्खनन् त्यसको प्रोसेस मात्रै हामीले ठिक ढंगले गर्न सक्यौँ भने सयौँ वर्षका लागि नेपालीहरूको आर्थिक स्थिति संसारकै उच्च बनाउन सकिन्छ रे भन्ने चर्चा पनि छन्,” उनले भने ।

एमाले अध्यक्ष ओलीको नाम नलिइ प्रधानमन्त्री प्रचण्डले आफूले सो चर्चाको विषयमा कसैलाई आरोपप्रत्यारोप गर्ने पक्षमा नरहेको बताए ।

“हामी नेपालीहरूलेभन्दा विदेशीहरूले अघि बढी मुस्ताङ र त्यहाँ भएको प्राकृतिक स्रोत खनिज पदार्थबारे बढी जानकारी राख्छन् भन्ने पनि तपाई हामीले सुन्दै आएको पनि हो । हिजोआज एउटा चर्चा भएको पनि तपाईंहरूले सुन्नु भएको छ मुस्ताङकै विषयमा । र, मुस्ताङमा बुद्धको युनिभर्सिटी बौद्ध युनिभर्सिटी खोल्ने कुरा भन्ने पनि आयो । पक्कै पनि त्यहाँ स्थानीयबाट चाहिँ कलेज खोल्ने, युनिभर्सिटी खोल्नेभन्दा पनि कलेज खोल्ने चर्चा चाहिँ धेरै पहिलेदेखि भएको रहेछ,” उनले भने, “तर, नेपाल सरकारले कहीँकतै स्वीकृति दिएको स्थिति होइन । तर, जे भए पनि मुस्ताङको चर्चा यतिधेरै किन गर्छन् । मैले अन्त जान खोजेको होइन । मैले कसैलाई आरोप र प्रत्यारोप गर्न खोजेको पनि होइन । तर, मुस्ताङको चर्चा यति धेरै किन हुने गरेको छ । र, मुस्ताङको चर्चा आउनेबित्तिकै अलि बढी हामी नेपालीहरू संवेदनशील किन हुने गर्छौँ भन्दा हाम्रो प्रकृतिको गर्भभित्र धेरै यस्ता वस्तुहरू, यस्ता खनिजहरू छन् ।”

उनले मुस्ताङमा भएको खनिज पदार्थबारे स्वदेशमा भन्दा पनि विदेशीहरू बढी जानकार रहेको आफूले सुनेको बताए ।

प्रधानमन्त्री प्रचण्डले मुस्ताङमा भएको अमूल्य खनिज पदार्थको ठिक ढंगले उपयोग गर्न सकियो भने मुलुकको आर्थिक स्थितिमा आमूल परिवर्तन ल्याउन सकिने बताए ।