महोत्तरी, २२ फागुन । नेकपा (माओवादी केन्द्र)का उपमहासचिव तथा पूर्वमन्त्री गिरिराजमणी पोखरेलले मुलुकलाई द्वन्द्वतर्फ धेकेल्न केही शक्ति लागिपरेको बताएका छन् ।
प्रधानमन्त्री पुष्पकमल दाहाल ‘प्रचण्ड’विरुद्ध भएको फैसलालाई संकेत गर्दै उपमाहासचिव पोखरेलले टिम बनाएर केही तत्त्व समस्या बल्झाउनेतर्फ लागेको आरोप लगाए ।
महोत्तरीको बर्दिबासमा सञ्चारकर्मीसगँ कुरा गर्दै उनले संक्रमणकालीन न्यायका काममा ढिला भएको स्वीकार गर्दै तीव्रतापूर्वक यी कामलाई टुंगो पुर्याउनुपर्ने तर्क गरे । “द्वन्द्वको दुवै पक्षमा परेका समस्यालाई शान्ति प्रक्रियाका राजनीतिक शक्ति मिलेर हल खोज्नुपर्छ,” उनले भने ।
कांग्रेससहितको ८ दलीय गठबन्धनमा कुनै शंका नगर्न पनि उपमाहासचिव पोखरेलले आग्रह गरेका छन् । राष्ट्रपति निर्वाचनपछि राजनीतिक समीकरण परिवर्तन हुन्छ भन्ने सञ्चारकर्मीको प्रश्नमा उनले भने, “नेपाली कांग्रेस ठूलो गल्ति गरेर ब्युझिएको छ, फेरि एमालेको उक्साहटमा लाग्दैन र पुराना गल्ति दोर्याउँदैन ।”
८ दलीय गठबन्धनमा अझैँ राप्रपा, राष्ट्रिय स्वतन्त्र पार्टी थपिनेमा पनि उपमहासचिव पोखरेलले विश्वास व्यक्त गरेका छन् ।
शक्तिपृथकीकरणको कोणबाट प्रधानमन्त्री माओवादीसँग, सभामुख एमालेसँग, राष्ट्रपति नेपाली कांग्रेससँग पुग्दा प्रकान्तरले देशलाई फाइदा नै पुग्ने जिकिर गर्दै उपमहासचिव पोखरेलले शक्ति दुरुपयोग गर्ने प्रवृत्तिलाई यस्ले चेक एण्ड व्यालेन्समा राख्ने दाबीसमेत गरे ।
जन्ताले खोजे जस्तो नहुँदा मूलधारका पार्टीको बहुमत नआएको दाबी गर्दै सरकारले प्रणाली निर्माणलाई चुस्तदुरुस्त र अर्थतन्त्रमा देखिएका जटिल समस्यालाई हल गर्ने बताए ।
प्रतिक्रिया दिनुहोस्