काठमाडौं, १३ माघ । केपी ओलीको सरकारको समयमा विग्रेको सम्वन्धलाई ओलीकै नेतृत्वमा भावि सरकार निमार्ण हुने क्रममा छिमेकी मित्रराष्ट्र भारतले नेपाल संग मजबुत सम्बन्ध कायम गर्ने प्रयास सुरु गरेको छ ।

संविधानमा असन्तुष्टि जनाउँदै नेपालमाथि लगाएको नाकाबन्दीले सम्बन्ध चिसिएको स्वीकार गरेको भारतले त्यसलाई सुधार गर्न आफैले पहलकदमी अघि बढाएको छ । वाम गठबन्धनको नयाँ सरकारसँग सम्बन्ध समधुर बनाउँदै उच्चस्तरको सहकार्य गर्ने नीतिसहित भारतीय विदेशमन्त्री सुष्मा स्वराज नेपाल आउन लागेकी छन । नेपालस्थित भारतीय दूतावास स्रोतका अनुसार बिदेशमन्त्री स्वराज प्रधानमन्त्री नरेन्द्र मोदीको बिशेष दुतका रुपमा दुई दिने भ्रमणका लागि आगामी १८ माघमा नेपाल आउने भएकी हुन् । दुतावासले भ्रमणको आधिकारीक जानकारी भने दिएको छैन ।

नयाँ सरकार गठन अगावै विदेशमन्त्री स्वराज नेपाल आउनुलाई भारतले नेपाल नीति फेरेको अनुमान लगाउन सकिने कूटनीतिक विश्लेषकको विष्लेषण छ । नेपाल भ्रमणका क्रममा भारतीय विदेशमन्त्री स्वराजको एमाले अध्यक्ष ओलीसँग हुने भेटघाटलाई दिल्ली र काठमाडौं दुवैतिर ठूलो महत्व दिएका छन् । यस भेटघाटमा मोदी र ओलीको सम्भावित नेपाल र भारत भ्रमणका विषयदेखि आगामी दिनमा नेपाल–भारत सम्बन्धले लिने दिशाका विषयमा पनि छलफल हुन सक्ने बताइएको छ ।

वाम गठबन्धनका तर्फबाट एमाले अध्यक्ष ओलीलाई भावी प्रधानमन्त्रीका रूपमा बधाई दिँदै एक महिनामा दुईपटक फोन गरेका भारतीय प्रधानमन्त्री मोदीले यसअघि नै नेपाल नीति फेर्ने तयारी गरेका थिए ।