काठमाडौं । भैरहवाको गौतमबुद्ध अन्तर्राष्ट्रिय विमानस्थल (जिआइए) मा आगामी अक्टोबरबाट वीज एयरले साताको तीन उडानको तयारी गरेको छ।
बीच एयरले युएइको राजधानी आबुधावी–भैरहवा सिधा उडान गर्ने विमानस्थलका प्रवक्ता श्यामकिशोर शाहले जानकारी दिए ।
हंगेरीबाट विश्वका विभिन्न देशमा उडान गरिरहेको वीज सस्तो वायुसेवा कम्पनी भएको उनले बताए । वीज एयरले नेपाल नागरिक उड्डयन प्राधिकरणबाट आबुधावी–भैरहवा गन्तव्यमा साताको तीन उडान गर्न अनुमति मागेको छ।
वीज एयरले अक्टोबर ३० बाट सातामा तीन उडान गर्न प्राधिकरणसँग अनुमति मागेको प्रवक्ता शाहले जानकारी दिए ।
उनका अनुसार वीज एयरले एयरबसको ३२१ निओ सिरिजको विमान सञ्चालनमा ल्याउने योजना बनाएको छ। एक सय ९० सिट क्षमताको यो जहाजले नेपालमा पहिलोपटक उडान गर्न लागेको हो । भैरहवा विमानस्थलबाट पछिल्लो समय श्रम गन्तव्यका मुलुकमा जानेहरू बढेका छन् ।
भैरहवा–कुबेत उडान गरिरहेको जजिरा एयरवेजले विमानस्थल सेवा शुल्क छुट पाएको छ। हाल जजिराले उडान गरिरहेको एयरबस ३२० निओ जहाजले सेवाशुल्क वापत करिब एक लाख रूपैयाँ छुट पाएको छ।
जजिराले सोमबार, मंगलबार र शुक्रबार गरी सातामा तीन उडान गरिरहेको छ। आगामी सेप्टेम्बर १५ तारिखबाट भने हप्ताको सातै दिन उडान गर्ने तयारी गरेको प्रवक्ता शाहले जानकारी दिए।
प्रतिक्रिया दिनुहोस्