बुटवल, ९ मंसिर । नेपाल कम्युनिष्ट पार्टी (नेकपा)का महासचिव विष्णु पौडेलले पार्टीमा कम्युनिष्ट आन्दोलनकै ठुलो समस्या आएको बताउनु भएको छ ।  गृहनगर बुटवलमा प्रेस संगठनले आयोजना गरेको पत्रकार सम्मेलनमा बोल्दै महासचिव पौडेलले पार्टीमा अहिले सम्मकै ठुलो समस्या आएको बताउनु भयो । उहाँले नेकपामा जिवन समस्याग्रस्त र अन्तरबिरोध ग्रस्त भएको बताउँदै नेपाली जनता, नेकपाका मतदाता, र लाखौं कार्यकर्ताको चाहाना बिपरित पार्टी समस्याग्रस्त भएको खुलासा गर्नुभयो ।

यस अघि देखिएका समस्या भन्दा भिन्न प्रकारको समस्या पार्टीमा देखिएको उल्लेख गर्दै पौडेलले पार्टी अत्यन्त कठिन मोडमा गुज्रेको समेत उल्लेख गर्नुभयो । उहाँले पार्टीमा देखा परेका समस्याले बिगतमा जनतासँग गरेका बाचाहरु, प्रतिबद्धताहरु र बनाईएका योजनाहरु नै अलपत्र पर्ने अवस्थामा पुगेको बताउँदै जनतालाई जवाफ दिन सकेत नसक्ने अवस्थामा नेकपा पुगेको जिकीर गर्नुभयो ।

उहाँले पार्टीको एकता जोगाउनका लागि आफ्नो अन्तिम क्षण सम्म प्रयास रहने प्रतिबद्धता ब्यक्त गर्दै नेकपालाई एकताबद्ध राख्ने बिषय नेकपाको मात्र बिषय नभएर नेपाली जनताको भबिश्यसँग जोडिएको बिषय भएको स्पष्ट पार्नुभयो ।

पार्टीमा बिनाकारण अन्तरबिरोध चर्केको बताउंदै उहाँले अनयास समस्या चर्काईएको आरोप समेत लगाउनु भयो । पछिल्लो समय मर्यादा बिपरित क्रियाकलाप देखिएको बताउंदै पौडेलले मर्यादा बाहिर गएर कुनै क्रियाकलाप नगर्न कार्यकर्ताहरुलाई आग्रह गरे ।

पत्रकारको प्रश्नको जवाफ दिंदै महासचिव पौडेलले प्रधानमन्त्री ओली र नेपाली काँग्रेसका सभापति शेरबहादुर देउवाको भेटमा सत्ता समिकरणको बिषयमा कुनै पनि कुरा नभएको स्पष्ट पार्नुभयो । उहाँले प्रधानन्त्रीसँग सुबिधाजनक बहुमत रहेको अवस्थामा समिकरणको कुरा गर्न आवश्यक नरहेको बताउनु भयो ।