काठमाडौं १६ कात्तिक । चिकित्सकहरूले कोरोनाभाइरस (कोभिड–१९º संक्रमणको जोखिम रहेकाले मौसमी फ्लूका बिरामीलाई सतर्कता अपनाउन सल्लाहा दिएका छन् । अहिले अस्पतालहरूमा कोभिड संक्रमणको जोखिम रहेकाले मौसमी फ्लूको लक्षण देखिएका बिरामीलाई घरेलु उपचार गरी घरमै बस्न चिकित्सकहरूको आग्रह छ।

हरेक अस्पतालका आईसीयू बेडहरू कोभिडका बिरामीले भरिएको अस्तपतालहरुले बताएका छन् । मौसम परिवर्तन सँगै मौसमी फ्लूका लक्षणहरू देखिएका व्यक्तिहरूले घरमै बसेर सुरक्षित रहन फिजिसियन डा. रक्षा गौतमको सल्लाहा छ ।

अस्पतालहरूमा आईसीयू बेड खाली नभएको, अक्सिजन उपकरणहरू अपुग रहेकाले संक्रमितहरू अस्पताल पुगेर घर फर्किनुपर्ने अवस्था भएकाले सतर्क रहन उनले आग्रह गरिन्। डा. गौतमले उच्च स्वास्थ्य सुरक्षा अपनाएर घरमै सुरक्षित बस्न भनेकी छन्। मौसमी फ्लू र अन्य फ्लूको लक्षण उस्तै हुने भएकाले छुट्याउन गाह्रो हुने हुँदा आफैंले सतर्कता अपनाउनुपर्ने डा। गौतम बताउँछिन्।

सामान्य रुघाखोकी लाग्ने, जिउ दुख्ने र घाँटी दुख्ने समस्या सामान्य फ्लू भएकाले डराउनुपर्दैन। सामान्य अवस्थामा पारासिटामोल खाने, चिकित्सकको सल्लाह अनुसार भिटामिन बी र सीको प्रयोग गर्दा एक हप्तासम्म मौसमी फ्लू निको हुने चिकित्सकको सुझाव छ ।

सामान्य रुघाखोकी लाग्दैमा हतार– हतार अस्पताल पुगेर अस्पतालबाट आफूलाई नभएको फ्लू समेत लिएर जाने सम्भावना रहेकाले सचेत रहनु आवश्कय रहेको आयुवेर्द अभ्यासकर्ता नारायण आचार्यले बताए ।
मौसमी फ्लूका लक्षण देखिएपनि स्वास फेर्न गाह्रो हुने, धेरै जिउ दुख्ने, धेरै पसिना आउने, औषधि सेवन गर्दा पनि ज्वरो निको नहुने, धेरे ज्वरो आउने जस्ता समस्या देखिएमा अस्पताल जान डा. भोला रिजालले बताए ।

नेपालमा बन्दाबन्दीको शुरूआति चरणमा सरकार र नागरिकस्तरबाट कडाईका साथ स्वास्थ्य सुरक्षाका मापदण्ड पालना भएपनि अहिलेको अवस्थामा त्यसो हुन नसकेको डा. रिजालको सल्लाह छ ।

रोग प्रतिरोधात्मक क्षमता भएका व्यक्तिहरू केही हप्तामा कोरोनामुक्त भएपनि दीर्घरोगी, बालबालिका तथा वृद्धवृद्धाहरूको बढी जोखिमका घटना भएका छन् ।