काठमाडौँ, २८ जेठ । सर्वोच्चले नवलपरासीका इन्द्र कुमारी देवी चौधरी र नारायण प्रसाद थारुको अपुताली सम्बन्धी मुद्दाको फैसला गर्दै नयाँ नजिर स्थापित गरेको छ । सर्वोच्चले अब बाबुआमाले अंश पाउनुअघि नै विवाह गरेकी महिलाले पनि अपुतालीमा हक दाबी गर्न पाउने व्याख्या गरेको हो।
स्थापित नजिर अनुसार बाबु आमाले अंश नपाउँदै विवाह गरेकी छोरीले पनि अब अपुताली पाउनेछन्। यसअघि सर्वोच्चको संयुक्त इजालसले विवाहित छोरीले अपुताली पाउन विवाह अघि नै आमा बाबुले अंश पाइसकेको हुनुपर्ने व्याख्या गरेको थियो।
२०६५ सालमा स्थापित उक्त नजिरमा भनिएको थियो, ‘बाबु आमाको अंश नै कायम भई नसक्दै विवाह भै आ–आफ्नो घर गैसकेको छोरीहरुले बाबु वा आमाको अपुतालीमा दावी गर्न पाउने अवस्था नहुने।’ उक्त नजिरले छोरा र छारीबीच पैतृक सम्पत्तिमा समान हक कायम हुने भन्ने संविधानको प्रावधान प्रतिकुल रहेको व्याख्या सर्वोच्चले गरेको हो।
न्यायाधीशहरु सपना प्रधान मल्ल, प्रकाशकुमार ढुंगाना र हरिप्रसाद फुयालको पूर्ण इजलासले भनेको छ, ‘विवाहित हुँदैमा छोरीलाई अपुतालीको क्रमबाट वेदखल गर्ने हो भने आफ्नै सन्तान पनि विभादित छोरी हुँदैमा आमाको अपुतालीबाट बहिष्कनरणको स्थिति आई विभेदित हुने अवस्था आउँदछ। नेपालको संविधान र कानूनले विवाहको आधारमा गरिने भेदभावलाई पूर्णरुपमा निषेध गरेको छ।
प्रतिक्रिया दिनुहोस्