काठमाडौं २ जेठ । सरकारले आगामी आर्थिक वर्षमा वीरगञ्ज– काठमाडौं र रसुवागढी– काठमाडौं रेलमार्ग निर्माणको प्रारम्भिक काम सुरु गर्ने घोषणा गरेको छ । यी दुवै रेल मार्ग भारत र चीनको अग्रसरतामा निर्भर हुने परियोजना हुन् ।

राष्ट्रपति विद्यादेवी भण्डारीले संघीय संसदको संयुक्त बैठकमा आगामी आर्थिक वर्ष २०७७ । ७८को नीति तथा कार्यक्रम प्रस्तुत गर्दै प्रस्तावित रेल मार्गको प्रारम्भिक अध्ययन प्रतिवेदन प्राप्त भइसकेकोले अब निर्माणको प्रारम्भिक काम सुरु गर्ने बताउनु भएको हो ।

नीति तथा कार्यक्रममा पूर्वापश्चिम रेलमार्गको काँकडभिट्टा– ईनरुवा(खण्डको निर्माणको पनि काम प्रारम्भ गर्ने उल्लेख छ । पूर्व(पश्चिम रेलमार्गको एउटा बाहेक सबै खण्डको विस्तृत परियोजना प्रतिवेदन तयार भइसकेको छ ।
वर्तमान सरकारका सबैभन्दा बढी महत्वाकांक्षी परियोजना नै यी दुई रेल मार्ग हुन् । तर ती रेल मार्ग सम्पन्न गर्न दुवै छिमेकी भारत र चीनले सहयोग नगरेसम्म नेपालले मात्र बनाउन तत्काल स्रोतको अभाव छ । यी आयोजनाका लागि बजेटमा कति रकम विनियोजन गरिनेछ, त्यसमा नै धेरै कुरा निर्भर हुनेछ ।