काठमाडौं, २३ चैत । सरकारले कैलाली, कञ्चनपुर र बाग्लुङ्गमा कोभिड १९ अर्थात् कोरोना भाइरसको र्यापिड टेष्ट गर्ने भएको छ ।
हिजो बसेको मन्त्रीपरिषद् बैठकले संक्रमण देखिएका कैलाली, कञ्चनपुर र बाग्लुङ्ग जिल्लामा र्यापिड टेष्ट गर्ने निर्णय गरेको हो । ती जिल्लामा ठूलो संख्यामा कोरोना भाइरसको नमुना परीक्षण गर्ने र शंका लागेका लाई पिसिआर प्रविधिबाट पुन परीक्षण गर्ने निर्णय बैठकले गरेको सरकारका प्रवक्ता, अर्थमन्त्री तथा संञ्चार तथा सूचना प्रविधि मन्त्री डाक्टर युवराज खतिवडाले जानकारी दिनुभयो ।

संक्रमितको संख्या बढ्दै जादा सरकारले लकडाउनलाई अझ कडा बनाउदै एउटा प्रदेशबाट अर्को प्रदेश, एउटा जिल्लाबाट अर्को जिल्ला तथा एउटा स्थानीय तहबाट अर्को स्थानीय तहबीचको आवागमनलाई रोक्ने निर्णय गरेको छ । त्यसैगरी स्वास्थ्यकर्मीहरुको मनोबल वृद्धि गर्नका लागि प्रोत्साहन भत्ताको व्यवस्था गरिनुको साथै स्वास्थ्य सुरक्षाका उपकरणहरु यथासंभव छिटो उपलब्ध गराउने निर्णय पनि बैठकले गरेको छ । उपचारको क्रममा स्वास्थ्यकर्मी माथि बाधा उत्पन्न गराउने तथा स्वास्थ्यकर्मीको सुरक्षामा आच पुर्याउने काम भए त्यस्ता व्यक्तिलाई कारवाही गरी स्वास्थ्यकर्मीको सुरक्षाको उचित व्यवस्था मिलाउन स्थानीय सरकारलाई भनिएको छ ।त्यसैगरी, सजाय निर्धारण गर्ने समितिमा बाहिरका विज्ञ व्यक्ति राख्ने व्यवस्था अनुसार सरकारले रविन्द्र भट्टराई र कुन्साङ लामालाई नियुक्त गर्ने गरेको छ । अपराध पिडित संरक्षण समितिमा विज्ञ रहने गरी डाक्टर शंकर कुमार श्रेष्ठलाई नियुक्त गर्ने निर्णय पनि गरिएको छ ।