काठमाडौं ११ जेष्ठ । प्रधानमन्त्री बनेपछि सार्वजनिक रूपमा औपचारिक सम्बोधन नगरेका बालेन्द्र शाह (बालेन) को कार्यशैलीलाई लिएर राजनीतिक वृत्तमा गम्भीर प्रश्न उठ्न थालेका छन्।

यस वर्षको गणतन्त्र दिवस मूल समारोहमा पनि प्रधानमन्त्रीले सम्बोधन नगर्ने निर्णय गर्दै उनले राष्ट्रपति रामचन्द्र पौडेल लाई सम्बोधन गर्न पत्राचार गरेका छन्। गणतन्त्रको प्रतीक राष्ट्रपतिलाई नै बोल्न दिनु उपयुक्त हुने सरकारको तर्क भए पनि आलोचकहरूले यसलाई कार्यकारी जिम्मेवारीबाट दूरी बनाउने संकेतका रूपमा व्याख्या गरेका छन्।

मन्त्रिपरिषद्ले गणतन्त्र दिवस मूल समारोह समिति भने बालेन शाहकै नेतृत्वमा गठन गरे पनि सार्वजनिक भाषण नगर्ने निर्णयले सरकारको सञ्चार शैलीबारे प्रश्न उठाएको छ।

यसअघि संसदमा नीति तथा कार्यक्रम प्रस्तुत हुँदा पनि प्रधानमन्त्रीले प्रत्यक्ष रूपमा प्रतिक्रिया नदिएको भन्दै विपक्षी दलहरूले कडा आलोचना गरेका थिए। त्यसपछि जवाफ दिने जिम्मेवारी अर्थमन्त्री डा. स्वर्णिम वाग्ले ले सम्हालेका थिए।

प्रतिनिधिसभा नियमावलीअनुसार प्रधानमन्त्री नियमित प्रश्नोत्तरमा उपस्थित हुनुपर्ने भए पनि अहिलेसम्म अनुपस्थित रहँदा संसदको जवाफदेहिता कमजोर भएको आरोप विपक्षीले लगाएका छन्।

राजनीतिक विश्लेषकहरूले प्रधानमन्त्रीको मौनता दीर्घकालीन रूपमा कार्यकारी नेतृत्वको पारदर्शिता र जवाफदेहितामाथि प्रश्न उठाउने अवस्था सिर्जना गरिरहेको टिप्पणी गरेका छन्।