काठमाडौं, २५ फागुन । बाराका पत्रकार विरेन्द्र शाहको हत्यामा संलग्न मुख्य आरोपीलाई १२ वर्षपछि प्रहरीले पक्राउ गरेको छ।
जिल्ला अदालत बाराले जन्मकैदको फैसला समेत सुनाएका फरार प्रतिवादी महागढीमाई नगरपालिका निवासी ४५ वर्षीय कुन्दन फौजदार भनिने नरेन्द्र फौजदारलाई बारा प्रहरीले आइतबार बिहान पक्राउ गरेको हो। उनलाई नियन्त्रणमा लिने क्रममा चार राउण्ड हवाई फाइरिङ समेत गर्नु परेको बताइएको छ । लामो समयदेखि फरार रहेका फौजदार होली मनाउनको लागि घरमा आएको गोप्य सूचनाका आधारमा प्रहरी उनको घर पुगेको थियो। पत्रकार शाहको हत्या पश्चात प्रहरीले बारा इनरुवा सिरहाका म्यानेजर गिरी र खापबा ८ का रामइकवाल सहनीलाई पक्राउ गरेको थियो। दुबै जना जन्मकैदको फैसलामा कारागार जीवन बिताइरहेका छन्।
पत्रकार हत्याका मुख्य आरोपी फौजदारमाथि एक दर्जनभन्दा बढी कर्तव्य ज्यान, डाका, लागुऔषध लगायतका मुद्धा पनि रहेको प्रहरीले जनाएको छ। उनलाई जिल्ला प्रहरी कार्यालय बारामा राखिएको छ। पत्रकार शाहको २०६४ असोज १८ मा पिपरा बजारबाट अपहरण गरी हत्या गरिएको थियो। अपहरणको ३५ दिनपछि उनको शव डुमरबाना गाविस ९ मा पर्ने चारकोसे जंगलमा गाडिएको अवस्थामा कात्तिक २३ गते फेला परेको थियो।
प्रतिक्रिया दिनुहोस्