काठमाडौं १ मंसिर । केपी शर्मा ओली र पुष्पकमल दाहाल प्रचण्डले विहीबार बागलुंग, स्यांजा र पर्वतका ३ वटा सभालाई सम्वोधन गर्दै पार्टी एकता भइसकेको घोषणा मात्र बांकी रहेको बताएका छन् । वाम गठबन्धनको चुनावीसभालाई सम्बोधन गर्न स्याङ्जाको पुतलीबजार पुगेका अध्यक्ष केपी ओली र माओवादी अध्यक्ष प्रचण्डले देशलाई आर्थिक विकासको लागि वामपन्थी गठबन्धन आवश्यक रहेको सविस्तार व्याख्या गरे ।

स्याङ्जा बजार र वालिङ बजारको दुईवटा सभा, बागलुंगको गल्कोट र पर्वतको कुश्मामा आयोजित सभालाई सम्बोधन गर्न पुगेका एमाले अध्यक्ष ओली र मा‌ओवादी केन्द्रका अध्यक्ष प्रचण्डले पाँच वर्षको लागि स्थायी सरकार बनाएर विकासको लहर अगाडि बढाउन वामपन्थी सरकार जरुरी रहेको बताए । ‘हामी कुनै स्वार्थको लागि तालमेल गरेका होइनौं’ओलीले भने, ‘हामी नजिक हुँदा बाहिरी शक्तिहरु आत्तिएको छ । अब ५ वर्ष सरकारमा जान पाउँदैनौ कि भनेर । विकासको नीती, मिति र तिथी नभएकाहरुले सत्ता ओगट्ने मात्र हुन् ।’उनले राष्ट्रले खोजेका नेताहरु अब जनताले आफैं तयार गर्ने बेला आएको रोचक ढंगले बताए ।

‘अबको मार्ग भनेको संघीय शासनको व्यवस्थामा जोड दिनु हो’ ओलीले भने ‘दिगो विकासको रुपमा नेपाललाई अगाडि सार्नुपर्छ भनेर संयुक्त राष्ट्र संघले पनि प्राथमिकतामा राखेको छ । कृषि, उद्योग, व्यापार, उर्जा र पुर्वाधारको क्षेत्रमा जोड दिनुपर्छ ।’ यही कुरा बामपन्थी सरकारले पूरा गर्नेछ ।

जनता के चाहन्छन् भन्दा पनि सत्ता कसरी हात लिने र आफूले सत्ताको दुरुपयोग गर्ने भनेर लागीपरेको बाह्य शक्तिको आयु बढी नरहने भन्दै ओलीले नाकाबन्दी जस्तो अप्ठ्यारो समयमा पनि कसैको सामु शिर नझुकाएको नेपाल अब उठ्न लागेको छ । ओलीले भने ‘स्वार्थको लागि भारतसँग शिर झुकाउदिन’, पाँच वर्षभित्र स्थायी सरकार बनाएर विपक्षीहरुले उडाउने मजाकलाई यथार्थमा बदल्ने लक्ष्य छ ।’ पूर्व–पश्चिम, पोखरा–लुम्बिनी र काठमाडौं रेलमार्ग, हिन्द र प्रशान्त महासागरमा नेपालको झन्डा फरफराउँदै पानी जहाज गुडाउने दिन अब धेरै समय छैन ।
ओली र प्रचण्डले पार्टी एकीकरण भइसकेको र आधिकारिक रुपमा घोषणा गर्न बाँकी रहेको बताएका थिए ।

माओवादी केन्द्रका अध्यक्ष प्रचण्डले एउटै एजेण्डा र एउटै भाषाका साथ वाम गठबन्धन अगाडि बढेको बताए । ०१९ सालबाट विभाजित भएको कम्युनिष्ट आन्दोलन अब एउटै धारमा हिँड्ने बताउँदै उनले अबको आवश्यकता नै वाम गठबन्धन मात्र होइन पार्टी एकता रहेको बताए । ‘७० वर्ष पछि अब ५ वर्षीय स्थायी सरकार बन्छ’ ०४६ मा नै वामपन्थी पार्टीहरु एउटै बनाउन मदन भण्डारीसँग सल्लाह भइसकेको थियो । एकीकरण गर्ने तयारी भइरहँदा उहाँको मृत्यु भयो । जसकारण आजसम्म वामपन्थी एक हुन सकेनन् । नेता र नेतृत्वले समयमा बुद्धि पुर्‍याउन नसके कि त इतिहास सय वर्ष पछि धकेलिन्छ कि त सय वर्ष अगाडि ।’प्रचण्डले सुनाए ।

‘निर्वाचन पछाडि पार्टी एकीकरण आधिकारीक रुपमा घोषण गरिन्छ’ प्रचण्डले भने ‘आजसम्म कम्युनिस्टसँग खेलेर अरुले शासन गरे वाम गठबन्धबारे कांग्रेसका मान्छे पनि खुसी छन् । विकासको लहरसँगै उनीहरु पनि कम्युनिस्टमा नै आउनेछन् । जनताले पहिलो पटक लामो समयसम्म वामपन्थी सरकार पाउने छन् ।’