काठमाडैं, २५ मंसिर  । नेपाल कम्युनिष्ट पार्टी नेकपाको सक्रियता अब सतहमा देखिने गरी बढ्न थालेको छ । नेकपा सचिवालयले पार्टी एकताका कामलाई छिट्टै सक्नेगरी सक्रियता देखाएसंगै पार्टी जीवनको त्राण धानेर बसेका नेता कार्यकर्ता र समर्थक सुभचिन्तकहरुमा आशा बढेको छ । एक वर्ष पछि पार्टी स्थायी कमिटीको बैठक आह्वान गरिनुले अब पोलिटब्यूरो समेत गठन हुने र केन्द्रीय कमिटी चलायमान हुने अनुमान गर्न सकिन्छ ।

नेपाल कम्युनिष्ट पार्टी(नेकपा) को संगठनात्मक सक्रियता केही दिन यता बढ्न थालेको छ । पार्टीको सचिवालय बैठक नियमित बस्न थालेको छ भने झण्डै एकवर्ष पछि अर्थात, मंसिर २९ गतेका लागि स्थायी कमिटि बैठक समेत बस्न लागेको छ । । पछिल्लो समय पार्टी एकताको बाँकी कामलाई पूणर्ताका लागि पनि सक्रियता बढेको देखिएको छ । पार्टी एकिकरणको यति लामो समय भइसक्दा पनि पार्टी एकिकरणका सबै प्रक्रिया नसकिँदा नेकपा वास्तवमै जीवनविहीन पार्टी जस्तै बनेको थियो । पार्टीमा संगठनात्मक सक्रियता नहुंदा नेता कार्यकर्ताहरु सिर्जनशिल बन्न सकेनन भने त्यसको सोझो प्रभाव मंसिर १४ गतेको उपनिर्वाचनमा समेत पर्यो । उपनिर्वाचनमा सिटमा तलमाथि नभएपनि नेकपाले सोचे अनुरुपको सफलता नपाउनु र पकड क्षेत्रसमेत गुमाउनुलाई नेकपा नेताहरुले पार्टी जनस्तरसम्म पुग्न नसक्नु र पार्टी एकिकरण प्रक्रियालाई पुरा गर्न नसक्नुलाई लिएका छन् । यद्यपी यसको औपचारिक छलफल भने आगामी सचिवालय र स्थायी कमिटीको बैठकमा हुनेछ ।

सोमबारको सचिवालय बैठकले अघिल्लो वर्ष बसेको स्थायी कमिटीको निर्देशनलाई मान्दै पार्टी विधानमा केही संशोधनहरु गरेको छ । त्यो संशोधनका विषयमा स्थायी कमिटीको निर्देशनको अतिरिक्त यसअघि सचिवालय बैठकमा नै भएका कतिपय निर्णयहरुलाई पनि आधार बनाई संशोधन प्रस्ताव तयार गरिनेछ बताइएको छ । यद्यपी यो प्रस्ताव स्थायी कमिटी र आवश्यकताअनुसार केन्द्रीय कमिटीमा पेश गरेपछि कार्यान्वयनमा जाने छ । नेकपाले उपनिर्वाचनको रिपोर्ट मंसिर २७ गतेसम्ममा केन्द्रसम्म पठाउन सम्बन्धित तहलाई निर्देशन समेत गरेको छ । विभिन्न केन्द्रीय निकाय र आयोगको गठनका लागि पार्टी महासचिवलाई तयारी गर्न लगाइएको छ । सचिवालयको आगामी बैठक मंसिर २७ गते बोलाइएको छ । मुख्य कुरा एक वर्षपछि पार्टीको स्थायी कमिटीको बैठक मंसिर २९ गते बोलाइएको छ । यसले पार्टी र सरकारका कामको समिक्षा गर्दै पार्टीलाई अगाडी बढ्न मार्गनिर्देशन गर्ने अपेक्षा गरिएको छ ।

पार्टी विधानमा स्थायी कमिटीको बैठक ३/३ महिनामा बस्ने भनिए पनि एक वर्ष पछि बस्न लागेको छ । एक वर्ष अघि बसेको स्थायी कमिटीको बैठकका कुनैपनि निर्देशन र सुझाव कार्यान्वयन हुन नसकेको भन्दै स्थायी कमिटी सदस्यहरु असन्तुष्ट बनेका छन् । अध्यक्ष प्रचण्डले अर्का अध्यक्ष एवं प्रधानमन्त्री केपी शर्मा ओलीको परामर्श पछि बसेको सचिवालय बैठममा अब तीन तीन महिनामै स्थायी कमिटी बस्ते प्रतिवद्धता जनाएका छन् । त्यसो त, अघिल्लो बैठकमा अधिकांश नेताहरुको पार्टी नेतृत्व र सरकारको कार्यशैलीप्रति तिव्र असन्तुष्टि थियो । एकिकरणका कामहरु समेत सुस्त गतिमा भए । त्यसैले अब बस्ने स्थाययी कमिटी बैठकमा सरकारको कामको प्रभावकारीता, सरकार सञ्चालनमा पार्टीको भुमिका र नेताहरुको जिम्मेवारीकै विषयमा बैठक केन्द्रीत हुने जिकिर गर्छन् नेताहरु ।

त्यसो त, केन्द्रीय कमिटीको बैठक हालसम्म एकपल्ट पनि बस्न सकेको छैन । स्थायी कमिटीको भुमिकालाई बलियो बनाउन स्थायी कमिटी सदस्यहरुको माग थियो । तर सचिवालय एकलौटी चलेको भन्दै यसमा असन्तुष्टि कायमै छ । पार्टीको महत्वपूर्ण अंग पोलिटब्यूरोको गठन अझै हुन सकेको छैन । सचिवालयको कयौँ निर्णयहरुमा अझैपनि त्रुटि रहेको भन्दै त्यसलाई नेताहरुले सच्याउन माग गरिरहेका छन् । आगामी स्थायी कमिटी बैठकमा यी सबै विषयमा छलफल हुने नेताहरुले अपेक्षा गरेका छन् । लामो समयपछि बस्ने बैठकसँग नेता, कार्यकर्ताको अपेक्षा त हुन्छ नै तर यो बैठकले नयाँ योजना, ल्याउने भन्दा पनि पुरानै एजेण्डाको कार्यान्वयनमा समेत ध्यान पुराउन आवश्यक छ । एकता प्रक्रिया सक्नु आवश्यकता छ भने संगठनलाई चलायमान र गतिशिल बनाउनुपर्ने छ । नेकपाको अबको यात्रा यस्तै सुस्त गतिमा रहन्छ अथवा तिव्र गतिमा अघि बढ्छ, आगामी बैठकले संकेत गर्ने नै छ ।