दाङ,१० मंसिर । दाङको क्षेत्र नम्वर ३ अन्तर्गतको प्रदेशसभा खमा हुन गैरहेको प्रदेशसभा चुनावको माहोलले दाङलाई तताएको छ । राजनीतिक दलहरु चुनावी नतिजा हात पार्ने गरी जनताको घरघरमा पुगेका छन् । चुनाव बहिस्कार गर्ने दलहरुले मतदातालाई चुनाब बहिस्कार गर्न आग्रह गर्दैछन् । तर, चुनावमा भोट हाल्ने मतदातामा भने त्यति उत्साह देखिदैन ।
दाङमा यति बेला चुनावी महोल निकै तातिएको छ । दलका उम्मेदवारहरुले दैनिक गाउँ गाउँमा चुनावी कार्यक्रम गरी मतदातालाई आफ्नो पक्षमा तान्न निकै लागेका छन् । दाङको क्षेत्र नं ३ (ख)मा प्रदेश सभा सदस्यको लागी र घोराही उपमहानगरपालिका वडा नम्बर १६ को वडाध्यक्ष पदको लागी यहि मंसिर १४ गते हुने निर्वाचनमा हिजो आज दाङमा केन्द्रिय नेताहरु आएका चुनावी सभा गर्दै आएका छन् । तर मतदाताहरुलाई भने कागलाई बेल पाक्यो हर्ष न विषमात भने झैं भएको छ । मतदाताले विभिन्न निर्वाचन उम्मेदवारहरुलाई जिताएर पठाएको भए पनि उनीहरुले गाउँको विकास भन्दा आफ्नो विकास बढि गरेकाले आधारभूत जनतालाई उपनिर्वाचनको त्यति महत्व छैन ।
निकै चासोका साथ हेरिएको पश्चिम दाङको उप निर्वाचनमा नेकपा, कांग्रेस, समाजबादी पार्टी, राप्रपा संयुक्त लगायतका १४ जना उम्मेदवार छन् । सबै आआफ्नो गच्छे अनुसार चुनावी मैदानमा होमिएका छन् । उम्मेदवारहरुमा भने कस्ले धेरै मत ल्याउने र जित्ने भन्ने होडबाजी चलेको छ । तर उक्त चुनावमा मत दिने मतदाता भने खासै उत्साहित देखिदैनन् ।विभिन्न पटकको चुनावमा मतादान गरेको दंगिशरण गाँउपालीका ७ का शरद पौडेलले जति पटक भोट हाल्दा पनि देशमा कुनै परिवर्तन नभएको गुनासो गर्छन् । पौडेलले चुनावको बेला जनता सामु आएर झुठा आश्वसन दिने पछि जितेपछि आफ्नै दुनो सोझाउने काम मात्र भएको बताउंछन् । चुनावमा बिभिन्न किसिमको बिकासका नारा लिएर भोट माग्न आउने र जितेर गएपछि बिकासको कुरा त परै जाओस फर्केरसम्म पनि नआउने गरेको बताउंछन् अर्का मतदाता नोखराम खड्का । ३६ बर्ष अघिदेखि देखाएको बिकासे योजना अहिलेसम्म पुरा गर्न नसकेको बताउंछन् खड्का । दंगिशरण गाँउपालीका वडा नं ५ का थकाली थारु र वडा नं ७ का झुल्प चौधरीले पनि चुनावमा जितेर गएका जुन नेता आएपनि आफुले बिकास नपाएको र झुटा आश्वासन मात्र दिने गरेको गुनासो गर्छन् ।
तर, प्रदेश सभा सदस्यका लागी उम्मेदवार बनेका नेताहरुले आफुहरुले जिते पश्चिम दाङको विकास गर्ने भन्दै आएका छन । नेकपाको तर्फबाट उम्मेदवार बनेकी विमला वलीले आफुले जिते पश्चिम दाङको विकास गर्ने र आफ्ना श्रीमानका अधुरा सपना पुरा गर्ने बताउंछिन् । यसैगरी नेपाली काग्रेसका उम्मेदवार केशबराज आचार्यले पनि पश्चिम दाङको विकास आफु लागिपर्ने वाचा गर्छन् । आफुले जिते दाङलाई प्रदेशको राजधानी बनाउन पहल गर्ने आश्वासन दिएका छन् उनले मतदातालाई ।
मतदातामा चुनावी आकर्षण कम भएपनि राजनीतिक दलका नेता कार्यकर्तामा भने चुनवाको उत्सव कायमै छ । चुनाव बहिस्कार गर्ने पार्टी पनि दाङमा क्रियाशिल छ । चुनावी माहौलकै बीच मोहन वैद्य नेतृत्वको क्रान्तिकारी माओबादीले भने उपनिर्वाचन बहिस्कार अभियान चलाएको छ । कसैको बहिस्कार कसैको चुनावी प्रचार । अधिकांश स्थानीय मतदाता भने चुनावको दिनसम्म निर्णय गर्ने मनस्थितिमा छन् । जति गालि गरेपनि आखिरमा देश चलाउन भने नेता नभै नहुने निस्कर्ष मतदाताको रहेको छ ।
प्रतिक्रिया दिनुहोस्