काठमाडाँै, १६ कात्तिक ।  आसन्न मंसिर २१ गते हुन गइरहेको प्रतिनिधि सभा र प्रदेश सभा सदस्य निर्वाचनका लागि काठमाडौँ क्षेत्र नं ६, ९ र १० मा उम्मेदवारी दर्ता नयाँ बानेश्वरस्थित अन्तर्राष्ट्रिय सम्मेलन केन्द्रमा भइरहेको छ ।

ती निर्वाचन क्षेत्रमा अहिलेसम्म ठूला दल नेपाली काँग्रेस वाम गठबन्धनका नेकपा (एमाले) र नेकपा (माआवादी केन्द्र) सहित साना दलले उम्मेदवारी दर्ता गराउनुभएको निर्वाचन अधिकृतको कार्यालयले जानकारी दिएको छ ।

क्षेत्र नं ६ बाट प्रतिनिधि सभाका लागि वाम गठबन्धनबाट माओवादी केन्द्रका झक्कुप्रसाद सुवेदी र काँग्रेसबाट भीमसेनदास प्रधानले उम्मेदवारी दर्ता गराउनुभएको निर्वाचन अधिकृत पुष्पराज पाण्डेले जानकारी दिनुभयो । यस्तै राष्ट्रिय जनमोर्चाबाट अशोकविक्रम सिंहले उम्मेदवारी दर्ता गराउनुभएको छ ।

यसैगरी, सोही निर्वाचन क्षेत्रबाट प्रदेश सभाका लागि वाम गठबन्धनबाट एमालेबाट ‘क’ केशव स्थापित र ‘ख’मा योगेन्द्र संगौला तथा काँग्रेसबाट ‘क’ न्हुछेनारायण मानन्धर र ‘ख’ विष्णुभक्त तिमिल्सेना मनोनयन दर्ता गराउनुुभएको छ ।

यस्तै, प्रतिनिधि सभाका लागि क्षेत्र नं ९ बाट वाम गठबन्धनका तर्फबाट एमालेबाट कृष्णगोपाल श्रेष्ठ र काँग्रेसबाट ध्यानगोविन्द रञ्जितले उम्मेदवारी दर्ता गराउनुभएको निर्वाचन अधिकृत विदुर काफ्लेले जानकारी दिनुभयो । सोही क्षेत्रको प्रदेश सभाका लागि वाम गठबन्धनबाट एमालेका ‘क’मा अजयक्रान्ति शाक्य र ‘ख’मा एमालेकै केशव पोख्रेल तथा काँग्रेसबाट ‘क’ मा इन्द्रमान तुलाधर र ‘ख’ धर्मराज गौतमले उम्मेदवारी दर्ता गराउनुभएको छ ।

यसैगरी, १० नं निर्वाचन क्षेत्रबाट वाम गठबन्धनका तर्फबाट माओवादी केन्द्रबाट हितमान शाक्य र काँग्रेसबाट राजनकुमार केसीले उम्मेदवारी दर्ता गराउनुभएको छ ।

उहाँका अनुसार प्रदेश सभाका लागि वाम गठबन्धनबाट ‘क’ मा माओवादी केन्द्रबाट दिलीप महर्जन र ‘ख’मा एमालेका रमा आले तथा काँग्रेसबाट ‘क’ पुकार महर्जन र ‘ख’ धर्मानन्द श्रेष्ठले उम्मेदवारी दर्ता गराउनुभएको छ ।

वाम गठबन्धनका एमाले र माओवादी केन्द्र तथा काँग्रेसका नेता तथा पार्टी कार्यकर्ता बाजागाजासहित उम्मेदवार दर्ता गराउन सम्मेलन केन्द्र पुगेका थिए ।

उम्मेदवारी दर्ता गराउन शुरुमा साना दल राष्ट्रिय जनमोर्चा, विवेकशील साझा पार्टी र नेपाः राष्ट्रिय पार्टीका टोली पुगेका थिए ।