इलाम,९ चैत । इलामको सन्दकपुर गाउँपालिका ५ जमुनाका बासिन्दाले अवैध रुपको भारतीय मदिरा विक्री वितरण रोक्न माग गरेका छन् ।

भारतको सिक्किममा निर्माण हुने यस्तो मदिरा स्वास्थ्यकालागि पनि हानिकारक भएको भन्दै प्रशासनले प्रतिवन्धित गरेको छ । त्यस्तै नेपाल सरकारालाई कुनै पनि राजश्व नबुझाई एकलौटी बजार सिर्जना गरेका यस्ता मदिरालाई नियन्त्रणमा सरोकारवालाले कडा पहल गर्नु पर्ने स्थानीयले माग गरेका छन् ।

सन्दकपुर ५ जमुनाका बासिन्दाले आमभेला गर्दै यस्ता मदिरा नियन्त्रण गर्न माग गरेका छन् । जनप्रतिनिधि सहित, व्यवसायी, समाजिक अगुवा, सञ्चारकर्मी, प्रहरीलगायत ठूलो संख्यामा भेला भएका स्थानीयले सम्वन्धित निकायले कडाई गर्नु पर्ने जनाएका हुन् । त्यस क्षेत्रको पर्यटन विकासकालागि चैत्र २४ देखि ३० गते सम्म आयोजना हुने ढापपोखरी पर्यटन महोत्सवलाई लक्षित गर्दै वैठकले यस्तो मदिराको बेच विखनमा पूर्णरुपमा नियन्त्रण गर्नुे निर्णय गरेका हुन् ।

गाउँपालिकाले यसअघि नै यस्ता भारतीय मदिरा नियन्त्रणकालागि पहल जारी राखेको बताउदै महोत्सव मूल आयोजक समितिका अध्यक्ष तथा सन्दकपुर ५ का वडाध्यक्ष जित बहादुर साँवाले अव यो महोत्सवको अवसर पारेर थप प्रभावकारीरुपमा लागिने जनाए । यस्तो मदिरा वेच विखन र सेवन निषेध गर्न कडाईका साथ नियन्त्रणको प्रयास गरिरहेको भएता पनि सरोकारवाला सवैको साथ र सहयोग आवश्यक रहेको जमुना प्रहरी चौकीका इन्चार्ज हर्क सुब्बाले बताए ।