बाजुरा, १७ असार । दोस्रो चरणको स्थानीय तहको निर्वाचनको परिणाम छ तहमा आइसकेको छ ।
एक नगरपालिका र पाँच गाउँपालिकाको मत परिणाम सार्वजनिक भइसकेका छन् । एक नगरपालिका र दुई गाउँपालिकामा नेपाली काँग्रेसले तथा तीन गाउँपालिकामा नेकपा (एमाले)ले जितेको छ ।

मत परिणामानुसार उत्तरी भेगको स्वामीकार्तिक गाउँपालिकामा एमाले विजयी समूह विजयी भएको छ । स्वामीकार्तिक गाउँपालिकामा एमालेका चिरञ्जीवी शाही दुई हजार चार सय ५९ मत ल्याएर विजयी हुनुभएको छ । उहाँका निकटतम प्रतिद्वन्द्वी काँग्रेसका भरतबहादुर रोकायाले एक हजार सात सय ५९ मत ल्याउनुभएको छ ।

यसैगरी गाउँपालिका उपाध्यक्षमा एमालेकी मीमा बुढा विजयी हुनुभएको छ । उहाँले दुई दुई हजार तीन सय ६० र उहाँका निकटतम प्रतिद्वन्द्व नेपाली काँग्रेसकी मैना जोशीले एक हजार छ सय ९९ मत ल्याउनुभएको जिल्ला निर्वाचन कार्यालयले जनाएको छ ।