काठमाडौं,२१ पुस । सत्तारुढ दल नेपाल कम्युनिष्ट पार्टी नेकपाको तल्लो तहसम्मको एकताको बाँकी काम पुस महिनाभित्र नसकिने भएको छ ।

पार्टी एकताको कार्यविधि बनाउने अख्तियारी सहित गठन भएको कार्यदलले प्रतिवेदन बुझाउन ढिलाई गर्दा नेकपाको एकताको बाँकी काम पछि धकेलिएको हो ।

पुस र माघ भित्र एकताको सबै काम सकेर फागुन र चैतमा देशव्यापी अभियान सञ्चालन गर्ने तयारी भए पनि पुरा नहुने भएको हो । गत मंसिर २९ गतेबाट झन्डै दुई साता बसेको स्थायी समिति बैठकले यही पस मसान्तभित्र पार्टी एकताको काम सक्ने गरी खाका बनाउन ९ सदस्यीय कार्यदल बनाएको थियो ।

नेकपाले कार्यदललाई तल्लो तहको एकता प्रक्रिया टुङ्ग्याउने विधी, प्रक्रिया र मापदण्ड तय गर्ने कार्यदेश दिएको छ । सोही कार्यदेश बमोजिम कार्यदलले काम गरिरहेको र अबको केही दिनमा प्रतिवेदन सचिवालयलाई बुझाउने कार्यदलको तयारी छ ।

तत्कालीन एमाले र माओवादी केन्द्रबीच जेठ ३ गते पार्टी एकता भएपनि तल्लो तहसम्म एकताको काम सकिएको छैन । पार्टी एकतापछि सचिवालय, स्थायी समिति, केन्द्रीय समिति र प्रदेश समिति मात्र गठन भएको छ । पोलिटव्युरो र केन्द्रिय विभागहरु गठन भएको छैन भने नेताहरुलाई जिम्मेवारी समेत दिइएको छैन् ।

यस्तै दुवै पार्टीका जनवर्गिाय संगठन समेत एक भएका छैनन । नेकपालाई तल्लो तहको एकता प्रक्रिया टुङ्ग्याउन समस्या भएको हो । पार्टी एकता भएको ८ महिना हुन लाग्दा समेत जिम्मेवारी बाँडफाँड र तल्लो तहको एकता नटुङ्गिंदा नेकपाभित्र नेतृत्वको तिव्र आलोचना हुँदै आएको छ ।