काठमाण्डौं ४, असोज । पेट्रोलियम ढुवानी गर्दा हुने चुहावट रोक्नको लागि सरकारले ‘सेक्युरिटी लकिङ सिस्टम’ जडान गर्ने अवधारणा ल्याए पनि अहिले सम्म लागु हुन सकेको छैन । सरकारले उक्त निर्णय दुइ वर्ष पहिले नै कार्यान्वयनमा ल्याएको थियो ।

दुवै पक्षबाट ढिलाइ हुदाँ उक्त प्रविधि कार्यान्वयनमा आउन नसकेको हो । भारतले पनि आफ्ना ट्यांकरमा ताल्चा लगाइरहेका कारण ढिलाइ भएको निगमको दाबी छ । कात्तिक ०७३ मै निगमले दुई महिनाभित्र सबै ट्यांकरमा लकिङ प्रणाली जडान गर्न निर्देशन दिएको थियो ।

उक्त प्रविधिको चाबी भारतबाट तेल लोड गर्ने डिपो र ट्यांकरले तेल खन्याउने आयल निगमको डिपोसँग मात्र हुनेछ । बीच बाटोमा इन्धन खन्याउन मिल्ने छैन । त्यसकारण चुहावट वा चोरी हुने सम्भावना रहँदैन ।

भारतबाट इन्धन लोड गरेर ढुवानी भएको तेल कर्मचारीहरूको मिलेमतोमा बीच बाटोमा ट्यांकरबाटै हराउने समस्या छ ।

तेल लोड गर्दा र खन्याउदाबीचको अवधिमा ढुवानीका क्रममा तापक्रमका कारण पर्न सक्ने फरक परिमाणको हकमा निगमले दिने क्षतिपूर्तिमा टेकेर ट्यांकर कर्मचारीले अनियमितता गरेका घटना छन् । अहिलेको लकिङ प्रणालीमा ताल्चा तोडेर सजिलै तेल चोर्न सकिन्छ ।

पेट्रोलियम ढुवानी व्यवसायी महासंघका अध्यक्ष खगेश्वर बोहराले आगामी मंसिरभित्रमा सबै ट्यांकरमा लकिङ राख्नुपर्ने माग रहेको बताए । फिटिङ गर्ने दक्ष जनशक्तिका अभावका कारण पनि लकिङ जडानमा ढिलाइ भएको उनको भनाइ छ । बोहराका अनुसार एउटा ट्यांकरमा लकिङ प्रणाली जडान गर्न करिब एक लाख रुपैयाँ लाग्छ । अब आउने नयाँ ट्यांकरमा भने पहिले नै लकिङ प्रणाली जडान हुने निगमको भनाइ छ ।