एजेन्सी,५ पुस । श्रीलङ्काका राष्ट्रपति मैत्रिपाला सिरिसेनाले बिहीबार तीस जनालाई मन्त्रीको रूपमा नियुक्त गर्नु भएको छ ।

प्रधानमन्त्री रनिल विक्रमासिङ्घेसँगको सात हप्ता लामो संघर्षपछि राष्ट्रपति सिरिसेनाले मन्त्रीहरू नियुक्त गर्नुभएको हो ।

सर्वोच्च अदालतले संसद विघटन गर्न नमिल्ने अन्तिम फैसला सुनाएपछि उहाँले आफैले अपदस्त गरेका विक्रमासिंघेलाई गत आईतबार प्रधानमन्त्रीमा पुनः नियुक्त गर्नुभएको थियो ।

“संचार माध्यम र प्रहरीलाई साथमा राखेर नियुक्त गर्न चाहेकाले उहाँले मन्त्रीहरू नियुक्त गर्न ढिला भएको हो,” सरकारका प्रवक्ता रजिथा सेनारत्नेले भन्नुभयो ।

नयाँ मन्त्रीपरिषद्को कानुन मन्त्रीमा भने कसैलाई नियुक्त नगरिएको उहाँले जानकारी दिनुभयो ।

विक्रमासिङ्घेको पहिलेको सरकारका अर्थ र परराष्ट्रमन्त्रीलाई भने अहिले परिवर्तन नगरिने भएको छ । अर्थमन्त्रीमा मङ्गला सामाराविरा र विदेशमन्त्रीमा तिलक मारापानालाई जिम्मेवारी दिइएको छ ।

राष्ट्रपति सिरिसेनाले गत अक्टोबर २६ तारिखका दिन तत्कालिन प्रधानमन्त्री विक्रमासिङ्घेलाई अपदस्त गरेर पुर्व राष्ट्रपति महेन्दा राजापाक्षेलाई नियुक्त गर्नुभएको थियो ।

तर संसद र सर्वोच्च अदालतले उहाँको यो कदम गलत र अवैधानिक भएको भन्दै मान्यता नदिएपछि उहाँले पुरानै अवस्थामा फर्किनु परेको हो ।

आफैले हटाएको प्रधानमन्त्रीलाई फेरि नियुक्त गर्नुपरेपछि राष्ट्रपति सिरिसेनालाई काम गर्न गाह्रो हुने ठानिएको छ ।

प्रधानमन्त्री विक्रमासिङ्घेले नयाँ बर्ष सन् २०१९का लागि बार्षिक बजेट बनाउने विषय आफ्नो अहिलेको प्रमुख प्राथमिकता रहेको बताउनुभएको छ ।