धनकुटा,२८ असोज । जिल्ला प्रहरी कार्यालयले दशैँ, तिहारलगायत नजिकिएका चाडपर्वलाई दृष्टिगत गरेर विशेष सुरक्षा योजना लागू गरेको छ। चाडपर्वमा हुनसक्ने आपराधिक घटना रोक्न प्रहरीले विशेष सुरक्षा योजना बनाइ लागू गरेको हो।

चाडपर्वमा सडक सुरक्षालाई मुख्य प्राथमिकतामा राखेको र यसअन्तर्गत दुर्घटना रोकथाम, यात्रुका गुनासाको सुनुवाइ र यात्रु तथा सवारी साधनलाई सुरक्षा दिने प्रहरीको योजना छ। प्रहरीका चाडपर्व केन्द्रीत सुरक्षा योजनामा पटका, जुवा–तास नियन्त्रण गर्नेजस्ता कार्य मुख्य प्राथमिकतामा परेका छन। जिल्ला प्रहरीले चाडपर्वमा सुरक्षा व्यवस्था मजबुत बनाइराख्न सादा पोशाकमा प्रहरी परिचालन गर्ने र राति अबेरसम्म मेला लाग्न नदिने योजना बनाएको छ।

बजार अनुगमनलाई प्रभावकारी बनाउन र सार्वजनिक सवारी साधनको अभाव हुन नदिन पहल गरिने प्रहरीले जनाएको छ। वडादशैँ तथा तिहारमा सडकमा यात्रुको अत्याधिक चाप हुने भएकाले चालकले लामो समय सम्म सवारी साधन चलाउने र क्षमताभन्दा बढी यात्रु बोक्ने जस्ता कारणले दुर्घटनाको सम्भावना बढी हुने गरेको छ। यात्रुको चापको बाहना बनाएर बढी भाडा असुल्ने समस्या आउन नदिन प्रहरीले जिल्लाका विभिन्न ठाउँमा जाँच केन्द्र राखेको जनाएको छ।

कोशी लोकमार्गमा सडकको सुरक्षासँगै वडादशैँको नवरात्रिदेखि तिहारसम्म सवारी साधनको चाप बढी हुने हुँदा कोशी लोकमार्गमा सुरक्षाको उचित प्रबन्ध मिलाउन लागिएको प्रहरी प्रमुख तथा प्रहरी नायब उपरीक्षक सुरेन्द्र गुरुङले जानकारी दिए।

प्रहरीले ग्रामीण सडकमा पनि मातहतका प्रहरी एकाइबाट सुरक्षाका प्रबन्ध मिलाइएको जनाएको छ। सडक सुरक्षाका अतिरिक्त जिल्लाका शक्तिपीठमा लाग्ने मेला, तथा पूजापाठलाई व्यवस्थित र सुरक्षित राख्ने कार्ययोजना बनाइएको छ।

जिल्लाका विभिन्न शक्तिपीठमा वडादशैँमा मेला लाग्ने गरेको छ। जनशक्ति अभावका कारण सीमित प्रहरी मात्रै सुरक्षाका लागि खटिने हुँदा ग्रामीण क्षेत्रमा लाग्ने धार्मिक मेलामा सुरक्षा दिन मुस्किल रहेको जिल्ला सुरक्षा समितीका संयोजक तथा प्रमुख जिल्ला अधिकारी सिताराम कार्कीले जानकारी दिए।

आपराधिक गतिविधि नियन्त्रणका लागि चौबीसै घण्टा सशस्त्र र नेपाल प्रहरीको टोलीले गस्ती खटाइएको छ। पर्वको मौका छोपेर आपराधिक गतिविधि सञ्चालन गर्ने बढी हुने भन्दै सुरक्षा जाँच कडा पारिएको हो।