दाङ,४ असोज । सत्य निरुपन तथा मेलमिलाप आयोग प्रदेश मुकाम तुलसीपुर हिजोआज सुनसान जस्तै छ । एक जना अधिकृत कार्यालयमा बसिरहेका हुन्छन् ।

अरु कुर्सी प्राय खाली हुन्छन् । दैनिक कामकाज ठप्प हुनेगरेको छ । दुई महिना देखि आयोगको काम एक कदम पनि अघि बढ्न सकेको छैन् ।

दुई महिना अघि दैनिक कम्तिमा पनि ४-५ वटा उजुरीको प्रारम्भीक अनुसन्धान हुन्थ्यो, तर हिजोआज एउटा पनि उजुरीको अनुसन्धान नभएको अधिकृत हेमराज अधिकारीले बताउनुभयो ।

तत्कालिन नेकपा (माओवादी )र तत्कालिन राज्यपक्षबाट पीडित भएकाहरुको उजूरीको सुनुवाई तथा प्रारम्भीक अनुसन्धान तथा न्यायीक व्यस्थापन गर्ने उदेश्यले खोलिएको प्रदेश मुकामबाट अहिलेसम्म करिब सात सय मात्रै मुद्धाको प्रारम्भीक अनुसन्धान भएको अधिकृत अधिकारीले बताउनुभयो ।

उहाँले भन्नुभयो ‘आबश्यक अनुसार कर्मचारी नहुँदा हिजोआज काम ठप्प जस्तै छ ।’ आयोगमा पहिलो चरणमा १२ सय मुद्धाको फाईल मुकाम कार्यालय तुलसीपुर आएको थियो । अर्को पटक ५ सय फाईल दाङ आएको अधिकारीले बताउनुभयो ।त्यस मध्य अहिलेसम्म सातसय फाईललाई प्रारम्भीक अनुसन्धान गरि पठाईएको उहाँले बताउनभुयो ।

गएको वर्ष माघसम्म सबै फाईलको प्रारम्भीक अनुसन्धान गरिसक्नु पर्ने भएपनि आउदो माघसम्म पनि प्रारम्भीक अनुसन्धान हुन नसक्ने अवस्था रहेको मुकाम संयोजक चक्रदेव आचार्यले बताउनुभयो । उहाँका अनुसार करिब दुई महिना देखि कार्यालयबाट लेखापालको अवकासमा गएपछि कामकाज पूर्णरुपमा ठप्प भएको उहाँले बताउनुभयो । ‘दुई महिना देखि लेखापालको दरबन्दी रिक्त भएको छ’ उहाँले भन्नुभयो‘ त्यसले गर्दा पनि कामकाज ठप्प भएको छ ।’

लेखापाल नहुँदा आर्थिक कारोबार ठप्प भएको र आर्थिक कारोबार ठप्प हुँदा अन्य सेवा पनि प्रदान गर्न नसकिने उहाँको भनाई थियो ।

‘अनुसन्धानका क्रममा पीडितलाई कार्यालयमा बोलाउनु पर्ने र उनीहरुलाई यातायात वापतको भत्ताको ब्यबस्था गर्नुपर्ने हुन्छ’ उनले भने‘ लेखापाल नहुँदा पीडितलाई कार्यालयसम्म आउने तथा फर्कन यातायाता वापतको भत्ता उपलब्ध गराउन नसक्ने अवस्था भएपछि काम पूर्ण रुपमा ठप्प भएको छ ।’

लेखापालको दरबन्दी पूर्ति नहुँदासम्म काम शुरु नहुँने उनले बताए । लेखापालसहित दरबन्दी अनुसारका कर्मचारी नपठाउदासम्म यो समस्या ज्यूका त्यू रहने उनले बताए ।

उनका अनुसार मुकाममा दुई जना बिज्ञको दरबन्दी खाली छ । त्यस्तै २ जना अधिकृतको दरबन्दी मध्ये एकजना मात्रै कार्यरत छन् । त्यस्तै ४जना नासु मध्य अहिले एकजना मात्रै कार्यरत छन् ।

प्रदेश नं ५ को उच्च अदालत र सरकारी वकिलको कार्यालयमा रहेका मुकाको नेतृत्व उच्च सरकारी वकिल कार्यालयका प्रमुखले गर्नेछन् । गतजेठमा तुलसीपुरमा मुकाम स्थापन गरिएको थियो ।