काठमाडौं,२३ साउन । प्रमुख प्रतिपक्षी दल नेपाली काँग्रेसका सभापति शेरबहादुर देउवा सहभागी नहुने भएपछि संवैधानिक परिषद्को बैठक अनिश्चित बनेको छ ।

परिषद्का अध्यक्ष एवं प्रधानमन्त्री केपी शर्मा ओलीले आजका लागि बैठक बोलाएपनि काँग्रेस सभापति देउवा सिंगापुर जाने भन्दै बैठकमा सहभागी नहुने जानकारी गराएको थियो । जसका कारण बैठक अनिश्चित बनेको हो ।

यसअघि परिषद्ले प्रधानन्यायाधीशमा सिफारिस दीपकराज जोशीको नाम संसदीय सुनुवाइ समितिले अस्वीकृत गरेपछि काँग्रेस असन्तुष्ट बनेको छ ।

देउवा एक सातापछि मात्र स्वदेश फर्किने बताइएको छ । हिजो बोलाइएको बैठकमा समेत विपक्षी दलका नेता देउवाले समय नदिएपछि बैठक बस्न सकेको थिएन ।

प्रधानमन्त्री अध्यक्ष रहने संवैधानिक परिषद्मा प्रधानन्यायाधीश, सभामुख, राष्ट्रिय सभा अध्यक्ष, प्रमुख विपक्षी दलको नेता र उपसभामुख सदस्य हुन्छन् । कांग्रेसले सत्तारूढ दलले दुई तिहाइको दम्भ प्रदर्शन गरेको न्यायालयमाथि हस्तक्षेप गरेको आरोप लगाउँदै आएको छ ।