शिखर वार्ता क्रममा दुवै देशका प्रतिनिधिमण्डलको बसाइ, खानपिन र सञ्चार व्यवस्थापनमा उक्त खर्च हुने अनुमान गरिएको हो । यसबाहेक झन्डै १ करोड डलर सुरक्षामा खर्च हुने सिंगापुर प्रधानमन्त्रीले बताएका छन् ।

अमेरिकी राष्ट्रपति तथा उत्तर कोरियाली नेताबीच मंगलबार पहिलोपटक शिखर वार्ता हुँदैछ । यसले कोरियाली प्रायद्विपको विकासलाई नयाँ गति दिने विश्वास सिंगापुर प्रधानमन्त्रीले व्यक्त गरेका छन् ।

अन्तर्राष्ट्रिय सञ्चार माध्यमसँग कुरा गर्दै उनले यो वार्ता सिंगापुरको सान्टोसा टापुस्थित क्यापेला होटलमा हुने जानकारी दिए । वार्तामा भाग लिन उत्तर कोरियाली नेता आइतबारै सिंगापुर आइपुगेका छन् ।

अमेरिका र उत्तर कोरियाबीच वार्ता निम्ति ठाउँ टुंगो लगाउन सहज थिएन । दुवै यस्तो देशमा वार्ता गर्न चाहन्थे, जुन राजनीतिक र कूटनीतिक रूपमा स्विकार्य होस् ।

‘जब दुवै पक्षबाट सिंगापुरमा वार्ता गर्ने प्रस्ताव आयो, हामीले नाइँ भन्न सकेनौं,’ प्रधानमन्त्री लीले भने, ‘यो वार्ता सिंगापुरकै निम्ति पनि एक महत्वपूर्ण अवसर हो ।’

‘हाम्रो निम्ति सबभन्दा खुसीको कुरा के भने, यो वार्ता सिंगापुरमा गर्नुपर्यो भनेर हामीले प्रस्ताव गरेका होइनौं । दुवै पक्षले रोजेर हामीलाई प्रस्ताव गरेका हुन् । यसले अन्तर्राष्ट्रिय समुदायमा सिंगापुरलाई कसरी हेरिन्छ भन्ने छर्लंग पार्छ,’ उनले भने ।

सिंगापुर संसारका कम मुलुकमध्ये पर्छ, जसको अमेरिका र उत्तर कोरिया दुवैसँग कूटनीतिक सम्बन्ध छ ।

सिंगापुरको सूचना तथा सञ्चार मन्त्रालयले शिखर वार्ता निम्ति मिडिया सेन्टर स्थापना र व्यवस्थापनमा मात्र करिब ५० लाख डलर खर्च हुने बताए ।