काठमाडौँ, १५ वैशाख ।  युवा रोजगारीका लागि एसओएस बालग्रामले आवश्यक सहयोग गर्ने प्रतिबद्धता जनाएको छ ।

नेपालका बालग्राममा हुर्केका विद्यार्थीका लागि रोजगारीको विषय चुनौतीपूर्ण रहेको भए पनि सरकारले नयाँ योजनासहित स्वदेशमै युवा रोजगारीको कार्यक्रम अघि सारेमा बालग्रामले त्यसमा आवश्यक सहयोग गर्ने प्रतिबद्धता जनाएको हो ।

भूकम्पपीडितका लागि एसओएस बालग्रामले बनाइदिएको सिन्धुपाल्चोक जिल्लाको इन्द्रावती गाउँपालिका वडा नं १२ भीमटारस्थित १७७ वटा नयाँ घर र दोलखाको लाँकुरीडाँडामा निर्मित १०७ वटा घर हस्तान्तरण कार्यक्रममा भाग लिन अध्यक्ष सिद्धार्थ कौलसहितको टोली नेपाल भ्रमणमा आउनुभएको हो ।

अध्यक्ष कौलले प्रधानमन्त्री केपी शर्मा ओली र अन्य उच्च सरकारी अधिकारीसँग भेटवार्ता गरी सरकारलाई सहयोग गर्न आफूहरु तयार रहेको बताउनुभएको थियो ।

अभिभावक गुमाएका बालबालिकालाई परिवारमा आधारित संरक्षण गर्दै आएको तथा परिवार गुमाउनसक्ने जोखिममा रहेका बालबालिकाका अभिभावकका लागि परिवार सुदृढीकरण कार्यक्रममार्फत सहयोग गर्दै आएको बताउँदै यसलाई आगामी दिनमा पनि निरन्तरता दिइने उहाँको भनाइ थियो ।

प्रधानमन्त्री ओलीलाई एसओएस बालग्राम अन्तर्राष्ट्रियको सांगठनिक संरचना, संस्थाले संसारका १३५ मुलुकका बालबालिकाको उचित रेखदेख, स्याहार, शिक्षादीक्षा र संरक्षणका लागि गर्दै आएको कामबारे जानकारी गराएको एसओएस बालग्रामले जनाएको छ ।

प्रधानमन्त्री केपी शर्मा ओलीले सामुदायिक विद्यालयको स्तर उकास्न र गुणस्तरीय विद्यार्थी उत्पादनका लागि सरकारले चालू शैक्षिकसत्रदेखि मुलुकभर नयाँ विद्यार्थी भर्ना अभियान शुरु गरेकाले यसलाई सफल पार्नु राष्ट्रिय तथा अन्तर्राष्ट्रिय गैरसरकारी संस्थाको पनि दायित्व रहेको बताउनुभएको थियो ।

प्रधानमन्त्री ओलीले नेपालमा एसओएस बालग्रामले गर्दै आएका कामको प्रशंसा गर्दै यसलाई भविष्यमा पनि निरन्तरता दिन आग्रह गर्नुभयो ।

गोरखा भूकम्पलगत्तै नेपालका लागि एसओएस बालग्राम अन्तर्राष्ट्रियबाट रु एक अर्ब ४० करोड अर्थात् १४ मिलियन डलर बराबरको सहयोग नेपाललाई उपलब्ध गराइएको थियो ।

एसओएस बालग्रामले भूकम्पपीडितका लागि २८४ वटा नयाँघर बनाउनेदेखि भत्किएका थुप्रै सामुदायिक विद्यालय बनाउनाका साथै जीर्णाेद्धार कार्यसमेत गरेको प्रधानमन्त्री ओलीलाई जानकारी गराएको थियो ।

एसओएस बालग्राम नेपालका राष्ट्रिय अध्यक्ष डा ज्योतिरत्न धाख्वा, राष्ट्रिय निर्देशक ईश्वरीप्रसाद शर्माले नेपालमा बालग्राममार्फत भएका गतिविधिबारे प्रकाश पार्नु भएको थियो ।