गुल्मी, २ बैशाख । लामो समयपछि स्थानीय तहमा जनप्रतिनिधि आएपछि नागरिकले उनीहरुसँगै धेरै अपेक्षा गरेका थिए । आफूले चुनेर पठाएका प्रतिनिधिहरुले अनुभूति हुने खालका परिवर्तन गर्छन् भन्ने आशा नागरिकमा छ । तर, आधारभूत आवश्यकता नै पूरा गर्न नसकेपछि गुल्मीको रेसुंगा नगरपालिकावासीले भने स्थानीय सरकारसँग गुनासोको थुप्रो लगाएका छन् ।

राजनीतिक दलहरुले सिंहदरबारको अधिकार गाउँमा पुगेको बताउँदै आएका छन् । यसको अर्थ स्थानीय तहमा नै सम्पूर्ण अधिकार दिइएको छ । तर, गुल्मीको रेसुङ्गा नगरपालिकाको कार्यशैलीले सिंहदरबारको अधिकार गाउँसम्म पुग्न नसकेको देखिन्छ ।

जनप्रतिनिधिले स्थानीय सरकार संचालन गरेको लामो समय भएपनि कुनै परिवर्तनको प्रत्याभूति नभएको सेवाग्राहीहरुको गुनासो रहेको छ । गुल्मी उद्योग बाणिज्य संघका महासचिव तारा प्रसाद भुसाल जिल्लाकै पुरानो नगरपालिकामा भए पनि रेसुंगामा अस्तब्यस्त ट्राफिक, भत्किएका सडक, लोडसेडिङ, अस्वस्थ खानेपानी रहेको बताउँछन् ।

नगर प्रमुख डिल्लीराज भुसाल पनि नगरपालिकामा विद्युत् लगायतका समस्या रहेको स्वीकार्छन् । नगरप्रमुखका अनुसार रिडी तम्घास सडक र तम्घासभित्रको सडक जीर्ण छन् । यस्ता समस्या आफूले नजिकबाट नियालिरहेका र त्यसलाई प्राथमिकताका आधारमा सकेसम्म छिट्टै समाधान गर्ने नगरप्रमुख भुसालको भनाइ छ ।

नगरपालिकाभित्र बसोबास गर्ने नागरिकलाई सुविधा दिने दायित्व नगरपालिकाको हो । तर, शिक्षा, स्वास्थ्य, कृषि, पर्यटन, भौतिक पूर्वाधारबारे नगरपालिका गम्भीर नभएको नागरिकहरुको गुनासो छ ।नगरपालिकाका प्रमुख प्रशासकीय अधिकृत मुक्तिराम अर्याल नागरिकको यस्ता गुनासो चाँडै सम्बोधन हुने बताउँछन् ।

लामो समयपछि जनप्रतिनिधिले स्थानीय सरकार संचालन गरेकाले नागरिकले परिवर्तन चाँडै चाहेको प्रमुख जिल्ला अधिकारी गोपाल अर्याल बताउँछन् । त्यसैले ठोस योजना बनाएर कार्यान्वय गर्नुपर्नेमा प्रमुख जिल्ला अधिकारी अर्यालको जोड छ ।

आफूले चुनेर पठाएका प्रतिनिधि महसुस हुने परिवर्तन गरोस् भन्ने नागरिकको चाहना छ । उनीहरु आधारभूत सुविधा स्थानीय सरकारले पूरा गरोस् भन्ने चाहन्छन् । त्यसैले नागरिकको चाहनालाई स्थानीय सरकारले ठोस योजना बनाएर पूरा गर्न आवश्यक छ ।