काठमाडौं, २ जेठ । अमेरिकी राष्ट्रपति डोनाल्ड ट्रम्पले चिनियाँ राष्ट्रपति सी चिनफिङसँगको उच्चस्तरीय भेटवार्ताको केही घण्टापछि ताइवानलाई एकतर्फीरुप्मा स्वतन्त्रता घोषणा नगर्न चेतावनी दिएका छन्।

बीबीसीका अनुसार, ट्रम्पले ताइवानको विषयलाई “अत्यन्त संवेदनशील” भन्दै कुनै पनि एकपक्षीय कदमले क्षेत्रीय तनाव बढाउन सक्ने बताएका हुन्। बेइजिङबाट फर्किएलगत्तै ट्रम्पले ताइवानबारे अमेरिकाको अहिलेसम्मको अडानविपरित अभिव्यक्ति दिएपछि संसारभर तरंग उत्पन्न भएको छ ।

ट्रम्प र सीबीच भएको शिखर बैठकमा व्यापार, प्रविधि, सुरक्षा र ताइवानको मुद्दा प्रमुख एजेन्डामा रहेको थियो । सीले ताइवाबारे कुनै हस्तक्षेप नगर्न र ताइवान विषयमा कुरै नगर्न ट्रम्पलाई चेतावनी दिएका थिए ।भेटपछि ट्रम्पले पत्रकारहरूसँग कुरा गर्दै ताइवानले औपचारिक स्वतन्त्रताको घोषणा नगर्नुपर्ने संकेत दिएका हुन् । चीनले ताइवानलाई आफ्नो भूभागको हिस्सा मान्दै आएको छ र कुनै पनि स्वतन्त्रताको प्रयासलाई “रेड लाइन” बताउँदै आएको छ।बेइजिङले आवश्यक परे बल प्रयोग गरेर पनि ताइवानलाई नियन्त्रणमा ल्याउने चेतावनी पटक–पटक दिँदै आएको छ। ट्रम्पको अभिव्यक्तिले ताइवानमा राजनीतिक र सुरक्षा चासो बढाएको बीबीसीले जनाएको छ।विश्लेषकहरूका अनुसार, अमेरिकाले लामो समयदेखि ताइवानलाई सैन्य र राजनीतिक समर्थन गर्दै आए पनि ट्रम्पको पछिल्लो टिप्पणीलाई चीनसँग सम्बन्ध सुधारको संकेतका रूपमा हेरिएको छ।