रौतहट, २५ चैत । रौतहट जिल्लाको बकैया खोलाबाट ब्यापक रुपमा मापदण्ड विपरित ढुङ्गा बालुवा उत्खन्न हुने गरेको छ । समन्वय समिति रौतहटका कर्मचारीहरुको मिलोमत्तोमा खोलाबाट नियम विपरित ढुङ्गा बालुवा र गिट्टी उत्खन्न गरेको हो ।

जिल्लाको उत्तर पश्चिममा पर्ने जंगलसहियाको पशुपति क्षेत्रको लाल बकैया खोलाबाट जिल्लाको विभिन्न स्थानको विकास निर्माण कामका लागि मापदण्ड विपरित ढुङ्गा बालुवा निकासी हुने गरेको छ । रौतहटको गुजरा नगरपालिका वाड ३ र ४ स्थित बकैया खोलाबाट ठेकेदारले आफुखुशी स्काभेटर प्रयोग गरी ढुङ्गा, गिटटी, बालुवा उत्खन्न गरिरहेको फेला परेको छ ।

जिल्ला समन्वय समिति रौतहटले स्थलगत अनुगमन नगरी नदीमा खोलाजन्य सामाग्री उत्खन्नका लागि जथाभावी स्काभेटर मेशिन सञ्चालनको अनुमति दिने गरेको पाइएको छ । जिल्ला समन्वय समितीले अनुमति दिएका भन्दा धेरै परिमाणको ढुङ्गा बालुवा खोलाबाट निकल्ने गरेको हो ।

जिल्ला समन्वय समितिले चैत मसान्त भित्र १ हजार घनमिटर ढुङ्गा बालुवा निकाल्ने अनिमति दिए पनि विगत एक महिना देखि दैनिक ५ सय घनमिटर बराबर निकाल्ने गरेको छ । ठेक्केदार प्रमोद यादवले अनुमति पाएको स्थानको विकास निमार्णको कामका लागि मात्रै नभएर अन्य क्षेत्रमा प्रयोग गर्नको लागि पनि सो बकैया खोलाबाट ढुङ्ग निकाल्ने गरेको हो । अन्य क्षेत्रमा प्रयोग हुने ढुङ्गा बालुवा लोड गरे वापतको ४ सय रुपैया प्रति टेक्टर लिने गरेको भए पनि सम्बन्धित निकायको ध्यान जान सकेको छैन ।

गाउँलेले बारम्बार ठेक्केदारहरुलाई यहाँबाट गिट्टी, बालुवा नकाल्न भन्दा पनि बेवस्ता गरेका स्थानिय समाजसेवी युवराज ज्ञवालीले बताए । साथै ज्ञवालीले ठेकेदारले नियम विपरित बकैया खोलामा मेशिन प्रयोग गरेर ढुङ्गा, बालुवा र गिटटी उत्खन्न गर्दा वर्षायाममा हाम्रो गाउँ नै बाढीको चपेटामा पर्ने भएकोले जिल्ला समन्वय समिति र नगरपालिकाले समयमा नै ध्यान दिनु पर्ने बताए । नभए हामी जनता चुप लागेर नबस्ने र परिआए स्काभेटर र ट्रयाक्टरमा आगजानी गर्न पनि पछि नपर्ने ज्ञवालीले बताए ।

त्यस्तै स्काभेटर बस्ती नजिकको खोलामा प्रयोगमा ल्याउनै नहुने साथै यसको प्रयोगले खोला हाम्रो गाउँ नै सिध्याउने भएकाले यसलाई तुरुन्त रोक्नु पर्ने स्थानिय बासिन्दा गुणराज मैनालीले बताए ।

जिल्ला समन्वय समितीले ढुङ्गा उत्खन्नको अनुमति दिंए पनि नियमित अनुगमन नहुदाँ मापदण्ड विपरित उत्खन्न कार्य भएको हो । ढुङ्गा बालुवा उत्खन्न गर्दा अधिकतम गहिराई ४०० मिटर, लम्बाई २ मिटर र चौडाई २० मिटर हुनु पर्ने समन्वय समितिको अनुमतिपत्रमा उल्लेख भए पनि त्यस्तो नभएको पाइएको छ । ठेक्केदारहरुले नियम बिपरित काम गर्दा पनि जिल्ला समन्वय समिति र स्थानिय प्रहरी प्रशासन मौन रहनुले उनीहरुको पनि संलाग्नता हो भन्ने कुरा पुष्टी हुन्छ ।