काठमाडौं, ४ फागुन । नेकपा एमालेका अध्यक्ष केपी ओलीले आफू नेतृत्वको सरकारले राम्रा काम गर्न थाल्नेबित्तिकै देशभित्र र बाहिरका शक्तिले हटाइहाल्ने गरेको बताएका छन् ।
सोमबार आफ्नो चुनावी क्षेत्र झापा–५ मा घरदैलो गर्ने क्रममा ओलीले त्यही कारण आफूले एक कार्यकाल पूरा गर्न चार पटक प्रधानमन्त्री बन्नुपरेको बताए ।

आफ्ना विरोधीहरूले देशभक्ति र राम्रो काम गर्दा सहन नसकेको ओलीको भनाइ छ । ‘अलिकति काम गरेपछि सहनै सक्दैनन्, भत्काइहाल्छन् । देशभक्तिको काम गर्नै दिँदैनन् । देशको हितमा, देश विकास गर्ने काम गर्नै दिँदैनन्’, ओलीले भने, ‘विकास गर्नका लागि ठ्याक्क उभिएर हुँदैन । पाइला अगाडि सार्नुपर्छ । मैले रेल फेरि शुरू किन गर्न खोजेँ ? किन पानीजहाजको बाटोबाट सम्बन्ध जोड्ने भनेँ ? त्यसका निम्ति काम हुँदै थियो तर त्यो मैले शुरू गर्छु, फेरि सरकार भत्काउँछन् । फेरि शुरू गर्छु, फेरि भत्काउँछन् । एक कार्यकाल पूरा गर्न चारपल्ट प्रधानमन्त्री हुनुपर्‍यो ।’ ओलीले झापा–५ मा औद्योगिक क्षेत्र बनाउन नदिने भनेर देशभित्र र देश बाहिरका अनेक शक्ति लागेको ओलीको टिप्पणी छ । उनले दमकमा आफ्नो पहलमा बनेको भ्यूटावर नभएर बिजनेस कम्प्लेक्स रहेको समेत बताए ।‘भ्यूटावर भन्छन् ।

यो वास्तवमा भ्यूटावर नै होइन । यो एउटा बिजनेस कम्प्लेक्स हो । नयाँ खालको आईटी हबको रूपमा यसलाई विकास गर्ने सोचअनुसार अगाडि बढाएका हौं’, ओलीले भने, ‘त्यो कुरा चाहिँ नबुझ्ने मान्छेहरूले किन चाहियो भन्छन् । यो एकजना परिवार वा म गएर बसोबास गर्न बनाएको त होइन नि , यो ठाउँको विकास गर्नलाई बनाएको हो ।’