बुटवल, १५ फागुन । सरकारी कार्यालयहरुले सरकारी काम कहिले जाला घाम भन्ने उक्ती पालना गर्दा सम्म जनताले दुःख पाउने दिन सकिने छांट देखिंदैन । बुटवल स्थित यातायात ब्यवस्था कार्यालयमा स्मार्टकार्डका लागि आबेदन दिएका सेवाग्रहीहरुको स्मार्टकार्ड बिभागले नपठाईदिंदा हजारौ जनताहरुले सास्ती खेप्न बाध्य भएकाछन् ।
आफुसंग भएको सवारी अनुमतीपत्र नबिकारण, थप वा नयां अनुमती पत्र लिन बुटवल स्थित यातायात ब्यवस्था कार्यालयमा आबेदन दिएको ६ महिना बितीसक्दा पनि स्मार्टकार्ड हात नपर्दा सेवाग्रहीहरु मर्कामा परेकाछन् । यातायात ब्यवस्था बिभागले गत साउन १ गते देखि देशैभरी स्मार्टकार्ड बितरण गर्ने निर्णय गरेपछि कार्यालयहरुले नबिकरण गर्न आउने, थप गर्न आउने तथा नयां सवारी अनुमतीपत्रका आबेदन दिने सेवाग्रहीसंग स्मार्टकार्डको आबेदन लिएको थियो । तर आबेदन पठाएको ६ महिना सम्म बिभागले स्मार्टकार्ड नबपठाएपछि हजारौ सेवाग्रहरीहरु अप्ठेरोमा परेकाछन् ।
यातायात ब्यवस्था ऐनमा म्याद नाघेको ९० दिन भित्र नबिकरण गरिसक्नुपर्ने ब्यवस्था छ, तर नबिकरण सहित स्मार्टकार्डका लागि निबेदन दिएको ६ महिना सम्म कार्ड नआएपछि जनताहरु ट्राफिक प्रहरीको जरिवानामा पर्न थालेकाछन् । नबिकारणको रसिद काटेको ७ महिना सम्म लाईसेन्स नपाएपछि प्रहरीले सताउन सुरुगरेको सेवाग्रहीको गुनासो छ ।
यातायात ब्यवस्था बिभागमा बुटवलबाट मात्र ३२ हजार ९ सय ४४ जनाको स्मार्टकार्डका लागि आबेदन पुगेको छ । तर बिभागले फागुन १४ गते सम्म जम्मा २ हजार १ सय ९९ जनाको मात्र स्मार्टकार्ड छापेर पठाएको छ । ३० हजार आबेदकहरु हरेकदिन कार्यालय आउने र फर्कने गरेकाछन् । बिभागबाट कार्ड छापेर नआएका कारण बितरण गर्न नसकिएको यातायात ब्यवस्था कार्यालय, लाईसेन्स शाखा बुटवलका प्रमुख बेद प्रसाद अर्यालको भनाई छ ।
साउन, भाद्र र असोजमा आबेदन दिएका सेवाग्रहीको ९० दिन कटि सकेका कारण ऐन बिपरित सवारी चलाउन उनीहरु बाध्य बनेकाछन् । त्यसो त राजश्व दाखिला गरेको रसिद देखाए कारवाहि नगर्न ट्रफिक प्रहरीलाई भनिएको यातायात ब्यवस्था कार्यालयका प्रमुख अर्यालले बताउंछन् , तर प्रहरीले भने ९० दिन कटेको भन्दै जरिवाना असुल गर्ने गरेको सेवाग्रहीको गुनासो छ ।
आफ्नो छेमताले नभ्याउंदै देशैभरका कार्यालयबाट स्मार्टकार्ड बितरण गर्ने यातायात बिभागको निर्णय उसैको लागि घांडो बनेको छ, त्यसमा पनि कार्ड छाप्न ठेक्का पाएको कम्पनिले समयमा कार्ड नदिंदा जनताले दुःख पाएकाछन् । स्मार्टकार्डको प्रतिक्षामा रहेका देशैभरका हजारौ सेवाग्रहीको समस्यालाई समाधान गर्न सम्बन्धीत निकायको ध्यान जान आवश्यक छ ।