काठमाडौं, ६ फागुन । भुपू मन्त्रीहरुले गाडी फिर्ता नगरेपछि गृह मन्त्रालयमा नँया मन्त्री लाई गाडि कसरी व्यवस्था गर्ने भन्ने अन्यौलता सिर्जना भएको छ । देउवा सरकारका ४४ जना मन्त्रीमध्ये अधिकांशले गाडी फिर्ता गर्न नमान्दा गृहका कर्मचारीहरु नयाँ मन्त्रीलाई कसरी सवारी साधनको व्यवस्था गर्ने भन्ने अन्यौलमा छन् ।

सबै निवर्तमान मन्त्रीहरुलाई गाडि फिर्ता गर्न नोटिस जारी गरिसकेको र ७ दिनको समय दिएको गृह मन्त्रालयका सह सचिव ईश्वर पौडेलले बताए । गाडि फिर्ता नगरे थुतेरै ल्याउने तयारी गरेको जानकारी दिँदै उनले भने , ‘सवै निवर्तमान मन्त्री ज्यूहरुलाई शुक्रवार नै गाडी फिर्ता गर्न नोटिस दिइसकेका छौं, नोटिसमा ७ दिन भित्रको म्याद दिएका छौं । उहाँहरुले समयमै फिर्ता गर्नुभएन भने थुतेर पनि ल्याइन्छ ।’

मन्त्रीले प्रयोग गर्ने मुख्य (झण्डावाल) गाडीको व्यवस्थापन गृह मन्त्रालयले गर्छ । मन्त्रीले आफ्नो मन्त्रालयबाट समेत गाडी लिने गरेका छन् ।

‘आफ्नो मन्त्रालयबाट लिएका गाडीहरु उहाँहरुले मन्त्रालयमा नै फिर्ता गर्नु हुन्छ,’ सह–सचिव पौडेलले भने, ‘गृह मन्त्रालयले दिएको (झण्डावाल) गाडी अनिवार्य रुपमा गृह मन्त्रालयमा नै ७ दिनभित्र फिर्ता गर्नुपर्छ । नभए हामीले जहाँ भेट्टायो त्यतैबाट थुतेर ल्याउँछौं ।’

मन्त्रीको झण्डावाल गाडीमा गृह मन्त्रालयले नै खटाएका चालक हुने भएकाले निर्वातमान मन्त्रीले नचाहेमा पनि गाडी फिर्ता गर्न कुनै अप्ठेरो नभएको उनको भनाइ छ ।

इतिहासकै सबैभन्दा बढी (६४ सदस्यीय) मन्त्रिमण्डलको नेतृत्व गरेका कांग्रेस सभापति शेरबहादुर देउवाले प्रधानमन्त्रीबाट राजीनामा दिइसकेका छन् । देउवाले राजीनामा दिएको घोषणा गरेको केही समयमै नयाँ प्रधानमन्त्रीका रुपमा एमाले अध्यक्ष केपी ओलीले राष्ट्रपतिबाट शपथ ग्रहण गरेर कार्यभार समेत सम्हालिसकेका छन् ।

ओलीले शुक्रवारै २ मन्त्रीलाई पनि शपथ ग्रहण गराएका थिए । एमाले र माओवादी केन्द्रको (वाम गठवन्धन)ले एक–दुई दिनमै नयाँ मन्त्रीको पनि टुंगो लगाउने तयारी गरेको छ । अबको एक सातामा मन्त्रिमण्डलले पूर्णता पाउने एमाले–माओवादीका नेताहरुको भनाइ छ ।