धनकुटा, १७ माघ । धनकुटाको बेलहारामा मध्यमस्तरको विमानस्थल निर्माण गर्न विस्तृत सर्वेक्षणको काम सुरु भएको छ। विमानस्थल निर्माणको चर्चा चलेको पाँच दशक पछि सर्वेक्षणको काम सुरु भएसंगै स्थानीय उत्साहित भएका छन्।

वि.सं. २०२२ सालमा पहिलो पटक विमानस्थल निर्माणको चर्चा चलेको धनकुटाको बेलहारामा ५२ बर्ष पछि विस्तृत सर्वेक्षणको काम सुरु भएको हो।

संस्कृतिक पर्यटन तथा नागरिक उड्डयनमन्त्रालय अन्र्तगत परामर्शदाता रियलपाथ ईन्जिनियरिङ कन्सल्ट्यान्ट ललितपुरले बेलहरामा विमास्थल निर्माणको लागि विस्तृत सर्वेक्षण सुरु गरेका हुन्।

टोलीले ड्रोनको प्रयोग गरेर पहिलो चरणको स्थलगत अध्ययन गरिसकेको छ । पहिलो चरणबाटै टोपोग्राफि सर्बेगरी ५० सिट क्षमताको विमान उडान भर्नका लागि आवश्यक जमिनको सर्वेक्षण गरी मन्त्रालयमा पेस गर्ने ईन्जिनियर गुरु दत्त अधिकारीले जानकारी दिए । उनले भने, ‘सर्वेक्षणमा धावनमार्ग, पार्किङस्थल, टर्मिनल टावर, स्टाफ क्वाटर, फ्युल स्टेसन र सुरक्षा निकाय पोष्ट समेत समावेस गरी ६ महिनाभित्र डिपिआर तयार हुनेछ।’

संस्कृति पर्यटन तथा नागरिक उड्डयन मन्त्रालयको सिफारिसमा २०७३ सालमा मन्त्रीपरिषद् बैठकले विमानस्थल बनाउने सैद्धान्तिक सहमति दिएसंगै धनकुटामा विमानस्थल निर्माणको बाटो खुलेको थियो।

पटक पटकको सर्वेक्षणमा उपयुक्त देखिएको धनकुटाको बेलहारामा विमानस्थल निर्माण गर्न मन्त्रालयको सैद्धान्तिक सहमति आवश्यक पर्ने भन्दै नागरिक उड्डयान प्राधिकरणले थपकार्य अगाडि बढाउन सकेको थिएन।

तर, स्थानियको पटक पटकको डेलिकेशन पछि २०७३ साल माघ ९ गतेको मन्त्रीपरिषद बैठकले बेलहारामा विमानस्थल निर्माण गर्न सैद्धान्तिक सहमति दिने निर्णय गरेको पूर्व सभासद हेमराज भण्डारीले जानकारी दिए।

विगत पाँचवर्ष अघि नै बेलहारा डाँडामा नागरिक उड्डयन प्राधिकरणले विमानस्थल निर्माणका लागि पूर्वाधार अध्ययन गरि सिफारिस गरेको थियो। प्राधिकरणका इन्जिनियर मणिगोविन्द श्रेष्ठ नेतृत्वको टोलीले अध्ययन गरि विमानस्थल निर्माणका लागि योग्य भनी सिफारिस गरेको हो।

त्यसबेला धनकुटा नगरपालिकाको फौजेटार, महालक्ष्मी नगरपालिकाको घुमाउने र छथर जोरपाटी गाउँपालिकाको मुड्के आहालेको पनि सर्वेक्षण भएको थियो । तर धनकुटाको बेलहारा प्राविधिक हिसाबले उपयुक्त रहेको निष्कर्ष सहितको सिफारिस पत्र मन्त्रीपरिषद्मा पेस भएर स्वीकृति भएको थियो।

तर, त्यतिबेला साना विमानको लागि मात्रै संर्बेक्षण भएको भन्दै स्थानीयले मध्यमस्तरको विमानस्थल निर्माण गर्नुपर्ने माग राखेपछि पुन सर्बेक्षण गरिएको हो।

मध्यमस्तरको विमानस्थलनिर्माण गर्दा ४० देखि ५० घर विस्थापित हुने बताइएको छ। उनीहरुको पुर्नवासको लागि धनकुटा नगरपालिका सहित धनकुटाका स्थानीयतह, प्रदेस सरकार र केन्द्रिय सरकारसंग पहल गरी ब्यवस्थापन गरिने धनकुटा ९ का वडाध्यक्ष सन्दीप रायमाझीले बताए।

विमानस्थल निर्माण भएपछि पूर्वी पहाडी जिल्ला भोजपुर, संखुवासभा, ताप्लेजुङ र पाँचथरका केही भाग र धनकुटा तथा तेह्रथुम जिल्लाका सबै सर्वसाधारणलाई सुविधा पुग्ने बताइएको छ। यो प्रस्तावित विमानस्थल विराटनगर वाट २२ तुम्लिङटारबाट २४ र भोजपुरबाट १७ दशमलव ७४ नटिकल माईल टाढा रहेको छ।