काठमाडौं, २९ पुस । माघ २४ गते हुन गइरहेको राष्ट्रिय सभा निर्वाचनमा मतदाता नै नभएका दलले समेत दल दर्ता गराएका छन् । निर्वाचन आयोगले राष्ट्रिय सभा सदस्यको निर्वाचनको लागि १५ दिने सूचना निकालेर दल दर्ताको लागि आह्वान गरेकोमा २१ राजनीतिक दलले दल दर्ता गराएका हुन । तर, ती मध्येमा ८ दलले भने प्रस्तावक र समर्थकबिनै दर्ता गराएका हुन् ।

राष्ट्रिय सभाको निर्वाचनमा मतदाता हुन प्रदेशसभाको सांसद र स्थानीय तहका मेयर र उपमेयर तथा अध्यक्ष र उपाध्यक्ष रहने व्यवस्था छ । राष्टिय सभा निर्वाचनमा दल दर्ता गराएका ८ दलले एक सिट पनि जितेका छैनन् । शाखा अधिकृत धर्मचन्द्र तिमिल्सिनाले स्थानीय तह र प्रदेश तहमा एक सिट पनि नजितेका दलले समेत निर्वाचनका लागि दल दर्ता गराएको बताए ।

यसरी मतदाता नै नभएर दर्ता गराएका दलमा नेपाल परिवार दल, वहुजन समाजवादी पार्टी, नेपाली जनता दल, गान्धीवादी पार्टी, नेपाल परिवार दल, वहुजन शक्ति पार्टी, नेपाल नौलो जनवादी पार्टी र राष्ट्रिय मुक्ति आन्दोलन नेपाल दल रहेका छन् ।
शाखा अधिकृत तिमिल्सिनाले भने, ‘ती दललाई थाहा नभएर दल दर्ता गराउन आएका हुन्,’ उनले अगाडि भने, ‘उम्मेदवारी दिँदा प्रस्तावक र समर्थक नपाएपछि उनीहरूको दलको निर्वाचनमा कुनै औचित्य हुँदैन ।’

राष्ट्रिय सभा निर्वाचनका लागि नेकपा (एमाले), नेपाली कांग्रेस, नेकपा (माओवादी केन्द्र), संघीय समाजवादी फोरम नेपाल, नेपाल संघीय समाजवादी पार्टी, नेपाल मजदुर किसान पार्टी, संघीय लोकतान्त्रिक राष्ट्रिय मञ्च, राष्ट्रिय जनमोर्चा, राष्ट्रिय प्रजातन्त्र पार्टी (प्रजातान्त्रिक), विवेकशील साझा पार्टीले दल दर्ता गराएका छन् । यस्तै, राष्ट्रिय सभाको निर्वाचनको लागि दल दर्ता गर्नेमा नयाँ शक्ति पार्टी नेपाल, नेपाल दलित पार्टी, राष्ट्रिय जनता पार्टी, राष्ट्रिय प्रजातन्त्र पार्टी रहेका छन् ।

केही दलले भने निश्चित प्रदेशको लागि राजनीतिक दल दर्ता गराएका छन् । राष्ट्रिय जनमोर्चाले प्रदेश नंं ४ र ५, नेमकिपाले प्रदेश नंं ३, नेपाल संघीय समाजवादी फोरमले प्रदेश नम्बर २, राजपाले प्रदेश नम्बर २ र ७ का लागि मात्र सहभागी हुने भनेर दल दर्ता गराएका छन् ।