काठमाडौ, २२ फागुन । साउदीले कोरोना संक्रमण हुनेकाे संख्या कम हुँदै गएसँगै काेरोना नियन्त्रण सम्बन्धी मापदण्ड खुकुलो बनाएकाे छ । हिजो शनिबारदेखि लागु हुनेगरी साउदी प्रवेश गर्नेहरुले पीसीआर रिपोर्ट देखाउनुपर्ने र संस्थागत तथा होटल क्‍वारेन्टिनमा बस्नुपर्ने नियम खारेज गरेको हो ।

अब साउदी प्रवेश गर्ने यात्रुले विमानस्थलमा नेगेटिभ पीसीआर रिपोर्ट देखाउन नपर्ने त्यहाँको गृह मन्त्रालयको भनाइ छ । यस्तै अब कुनै पनि प्रकारको क्‍वारेन्टिनमा बस्नुपर्ने छैन । यात्रु विमानस्थलमा उत्रेर सिधै आफ्नो गन्तव्यमा जान सक्नेछन् । साथै मक्का र मदिनामा लागू गरिएको भौतिक दुरीको मापदण्ड पनि हटाइएको छ । तर मास्क लगाउन भने यी ठाउँमा अनिवार्य नै छ । यस्तै साउदीले अफगानिस्तान लगायत १५ वटा अफ्रिकी देशमाथि लगाएको सिधा उडानमाथिको प्रतिबन्ध पनि हटाएको जनाएको छ । (एजेन्सी)